Мииринэй улууһун Арыылаах нэһилиэгин 6 №-дээх орто оскуолатын аһылыгар таракааны уонна табах төҥүргэһин булбуттарын туһунан биллэрии Интернет ситимигэр тарҕаммыта. Үҥсүү киирбитин региону салайар киин бэлиэтээтэ.
Иһитиннэриини Үөрэх министиэристибэтигэр уонна улуустааҕы үөрэх салалтатыгар тиэртилэр. Улуус киинин холуобунай отделын үлэһиттэрэ, биллэрии тарҕаммыт күнүгэр тута оскуола остолубуойун бэрэбиэркэлии таҕыстылар.
Служебнай силиэстийэ түмүгэ алтынньы 22 күнүгэр биллиэҕэ. Үөрэх министиэристибэтигэр Интернет ситиминэн тарҕаммыт хаарытскалар дьыала дьиҥ туругар сөп түбэспэттэрин бэлиэтээтилэр.
Ол эрээри, оҕо оскуолаҕа тугу аһыы сылдьарын төрөппүт билиэхтээх. Онон мантан ыла, төрөппүттэр оскуолаҕа үөрэх-үлэ хаачыстыбатын бэрэбиэркэлиир бракеражнай хамыыһыйа састаабыгар киирэллэрэ булгуччулаах буолуоҕа. Бу Министиэристибэ олохтоох бэйэни салайыныы үөрэҕин уорганыгар рекомендательнай сурук ыытта.
