Саха сирин Судаарыстыбаннаһын күнүн көрсө Дьокуускай куоракка уонна муниципальнай тэриллиилэргэ култуурунай, успуорт уонна үөрэх тэрээһиннэрин хабар киэҥ бырагыраама ыытыллыаҕа. Бастакы бэрэсидьиэн Михаил Николаев төрөөбүт дойдутугар — Хаҥалас улууһугар — уопсастыбаннас үөрүүлээх мунньаҕа буолуоҕа.
Мунньах балаҕан ыйын 26 күнүгэр 11:30 чаастан Николаев-Кииҥҥэ (бастакы бэрэсидьиэн Михаил Николаев бибилэтиэкэтэ) ыытыллыаҕа. Аадырыһа: Чапаево с., Г. Саввин уул., 3 дьиэтэ. Тэрээһин өрөспүүбүлүкэ сайдыытын түмүктэрин таһаарарга уонна Саха сирин элбэх омуктаах норуотун сомоҕолуурга туһуланар.
Балаҕан ыйын 26 күнүгэр бырааһынньыктааҕы бырагыраама маннык суолталаах тэрээһиннэринэн салҕаныаҕа:
— 10:00 — СӨ Бырабыыталыстыбатын 1-кы №-дээх дьиэтигэр (Дьокуускай к., Киров уул., 11) Арассыыйа Федерациятын уонна Саха Өрөспүүбүлүкэтин судаарыстыбаннай наҕараадаларын туттарыы сиэрэ-туома.
— 11:00 — Дьокуускайга «Олоҥхо марафона» диэн маассабай сүүрүү. Маршрута: Өрөспүүбүлүкэ болуоссата — Доҕордоһуу болуоссата.
— 10:00 — Покровскай куоракка бастакы бэрэсидьиэн Михаил Николаев пааматынньыгар сибэкки дьөрбөтүн ууруу сиэрэ-туома.
Балаҕан ыйын 27 күнүгэр, Судаарыстыбаннас күнүгэр, киин куорат олохтоохторун уонна ыалдьыттарын баай ис хоһоонноох култуурунай уонна уопсастыбаннай бырагыраама күүтэр:
— 10:00 — Өрөспүүбүлүкэ сайдыытыгар сүҥкэн кылааттарын киллэрбит биллиилээх судаарыстыбаннай уонна бэлитиичэскэй диэйэтэллэр мэҥэ өйдөбүнньүктэригэр сибэкки дьөрбөтүн ууруу.
— 11:00 — Дьокуускайдааҕы кадеттар интэринээт-оскуолаларыгар (Дьокуускай к., Марха мкр., Дзержинскай уул., 17) «Кадет андаҕара» диэн үөрүүлээх тэрээһин.
— 15:00 — «Якутия – Республика наших сердец» диэн ааттаах норуоттар икки ардыларынааҕы бырайыак. А.Е. Кулаковскай аатынан Норуоттар доҕордоһууларын дьиэтигэр (Дьокуускай к., Поярков уул., 4).
— 16:00–18:00 — Киин сынньалаҥ уонна култуура пааркатын сайыҥҥы сыанатыгар «Саха сирэ — күүс төрдө» диэн эстрада улахан кэнсиэрэ.
— 18:00 — Былатыан Ойуунускай аатынан Саха академическай тыйаатырыгар (Дьокуускай к., Орджоникидзе уул., 1) «Үйэлэри уҥуордаан» испэктээк уонна «Триумф» СК (Дьокуускай к., Ойуунускай уул., 26) «Триколор Куубага» диэн үҥкүү успуордун улахан бэстибээлэ.
Бырааһынньыктааҕы нэдээлэ официальнай даататтан эрдэ саҕаланар. Балаҕан ыйын 22–25 күннэригэр өрөспүүбүлүкэ үөрэҕин тэрилтэлэригэр тиэмэлээх кылаас чаастара, судаарыстыбаннас уруоктара уонна викториналар ыытыллыахтара. Ону таһынан балаҕан ыйын 25 күнүгэр «Ыччат — ыраас куорат туһугар» диэн санитарнай ыраастааһын чэрчитинэн улахан экологическай аахсыйа буолуоҕа.
Тэрийээччилэр өрөспүүбүлүкэ бары олохтоохторун бу бэлиэ күнү Саха сирин устуоруйатыгар бииргэ бэлиэтииргэ ыҥыраллар.
