Дьокуускайга «Ийэ дойду уонна аармыйа биир!» диэн IV Өрөспүүбүлүкэтээҕи фашизмы утарар форум пленарнай мунньаҕа буолан ааста. Тэрээһин бойобуой дьайыылар бэтэрээннэрин, анал байыаннай дьайыы кыттыылаахтарын, байыаннайдары, волонтердары, былаас уорганнарын бэрэстэбиитэллэрин уонна ыччаты түмэ тарта.
Саха сирин баһылыга Айсен Николаев бэлиэтээбитинэн, төрдүс төгүлүн ыытыллар форум уонунан тыһыынча дьону түмэн, Арассыыйа норуоттарын сомоҕолоһуутун сылыгар ураты суолталанна.
«Бүгүн биһиги үлэбит, санаабыт уонна дьайыыларбыт барыта биир сыалга — аныгы фашизмы кыайыыга туһуланар. Аҕа көлүөнэ сэрииһит үгэстэрин салҕаан, биһиги буойуттарбыт анал байыаннай дьайыы саҕаланыаҕыттан Ийэ дойдуну көмүскүүллэр. Саха сириттэн сылдьар тыһыынчанан буойун Арассыыйа Федерациятын уордьаннарынан уонна мэтээллэринэн наҕараадаланна, 14 саха киһитэ Арассыыйа Дьоруойа буолла. Ийэ дойдуну көмүскээччилэринэн барыларынан киэн туттабыт уонна кинилэри барыларын дьиэлэригэр кыайыылаах кэлэллэрин күүтэбит. Ийэ дойду көмүскээччилэрин уонна кинилэр дьиэ кэргэттэрин өйөөһүн, фроҥҥа бары өттүнэн көмөлөһүү, саҥа эрэгийиэннэри чөлүгэр түһэриигэ көмөлөһүү биһиги уопсай иэспит буолар», — диэн Айсен Николаев бэлиэтээтэ.
