“Өбүгэлэрбит этэллэринии, сэтинньигэ Үргэлбит Ыйы кытта алтыста – кинилэр олох чугаһынан ааһыстылар, онон тойонноотоххо, сэтинньи уонна ахсынньы сылаас буолар чинчилээхтэр. Арай, Арктика соҕуруу өттүнээҕи улуустар – Өймөкөөн, Үөһээ Дьааҥы, Абый, Муома диэки тымныйыаҕа, онно даҕаны -40 кыраадыстан түһүө суоҕа. Өлүөнэ эбэбит күн бүгүнүгэр диэри турбакка эрэ уста сытар, улахан кыдьымах да суох, онон эмиэ хойутуу турар буолла. Хаарбыт кэмчи соҕус”, — диир норуот синоптига.
Илин эҥэр улуустарга бу бээтинсэҕэ уонна субуотаҕа (сэтинньи 6-7 күннэригэр) түүнүн -22, -23, күнүһүн -16, -17 кыраадыс буолар, сэтинньи 7-гэр диэри көтүппэккэ эрэ кыралаан кыраһалыыр. Киин улуустарга түүҥҥү өттүгэр -20, -21, күнүһүн -15, -16 кыраадыс, кыраһалаах. Бүлүү эҥэргэ түүн -19, -20, күнүс -14, -16 буолуоҕа, сэтинньи 1-3 уонна 7 чыыһылаларыгар хаардаах буолуоҕа.
Соҕуруулуу-арҕаа улуустарга сэтинньи 6-7 күннэригэр түүнүн -18, -19, күнүһүн -11, -13 кыраадыс күүтүллэр, нэдиэлэ устата кыраһа хаардаах. Өймөкөөҥҥө түүн -28, -30 кыраадыска тиийэ тымныйыа, күнүһүн -23, -24, улахан хаара суох, ол эрэн бэнидиэнньиккэ уонна оптуорунньукка кыралаан түһүөн сөп.
Дьааҥы эҥэр улуустарга түүнүн -23, -26 диэри тымныйар, күнүһүн -21, -22 буолар, сэтинньи 1, 2, 7 күннэригэр хаардыа. Халыма, Индигиир улуустарыгар түүнүн -24, -27, күнүһүн -22, -23 буолара сабаҕаланар, сэтинньи 3 күнүгэр хаардыыр. Арҕаа арктика улуустарыгар бээтинсэҕэ, субуотаҕа түүҥҥү өттүгэр -17, -19 кыраадыс, күнүһүн -16, -17 кыраадыс күүтүллэр, сэтинньи 1-3 уонна 7 күннэригэр хойуу хаардаах.
Ити курдук, сэтинньигэ өрөспүүбүлүкэ бары улуустарыгар хаар суоҕун кэриэтэ. Үүммүт нэдиэлэ, Тускул сылыктыырынан, балыктааһыҥҥа табыгаһа суох буолсу. Күн эстиитэ элбэҕэ суох, суруйда Улусмедиа саайт.
