Алтынньы 21 күнүгэр Ил Түмэн уочараттаах сүүрбэһис пленарнай мунньаҕар Саха сирин 2027 сыллааҕы уонна 2028–2029 сыллардааҕы былааннанар кэмнээҕи судаарыстыбаннай бүддьүөт туһунан сокуон барылын бастакы ааҕыыга ылыннылар. Кэлэр сылга дохуот 337,6 млрд солкуобайга, ороскуот — 340,3 млрд солкуобайга, дефицит — 2,7 млрд солкуобайга былааннанна. Бу туһунан Ил Түмэн пресс-сулууспата иһитиннэрдэ.
«Бүддьүөт бэрээдэгэ бэйэтэ олус уустук. Биһиги бүгүн, Ил Түмэн үлэтин бастакы күнүгэр, бастакы ааҕыыга ылынныбыт. Бастакы ааҕыыга, биллэн турар, дохуот уонна ороскуот чааһын көрдөрүүлэрэ былырыыҥҥытааҕар ордуктар. Холобур, хомунаалынай комплексыгар кэлиҥҥи сылларга бастакытын толору ирдэнэр сууманы, ол эбэтэр 56 миллиард солкуобайы, тыырдыбыт», — диэн Саха Өрөспүүбүлүкэтин Ил Түмэнин бэрэссэдээтэлэ Алексей Еремеев быһаарда.
Еремеев бэлиэтээбитинэн, бүддьүөт бэрээдэгин чэрчитинэн иккис ааҕыыга дохуот чааһын федеральнай бүддьүөттэн дотация, субвенция, субсидия уонна атын киириилэр быһыытынан улаатыннарыахтаахтар.
«Ол иһин бу ыстатыйалар хайаан даҕаны толоруллуохтара. Уопсайынан, парламент бүддьүөт бэрээдэгинэн күүстээх, күн аайы ыытыллар, уустук үлэтэ саҕаланна. Сокуону таһаарааччылар былаастарын уорганнарын кытта үгэс быһыытынан сөбүлэһэр хамыыһыйалар тэриллиэхтэрэ. Уонна биһиги, норуот талбыт дьокутааттара, кэлэр сылга үп сүрүн докумуонун ылынар туһугар быыбардааччыларбыт бырааптарын көмүскүөхтээхпит», — диэн эбэн биэрдэ Алексей Еремеев.
