Саха сиригэр бэйэ дохуоттарга барытыгар бигэ киирии бара турар, оттон сорох нолуок киириилэригэр былаан аһара туолла. Бу туһунан Саха Өрөспүүбүлүкэтин Ил Түмэнин сүүрбэһис (уочараттаах) пленарнай мунньаҕар бырабыыталыстыба чааһын түмүгүнэн өрөспүүбүлүкэ үбүн миниистирин эбээһинэһин толорооччу Иван Алексеев иһитиннэрдэ.
«Бырабыыталыстыба чааһын чэрчитинэн 2026 сыл тоҕус ыйын түмүгүнэн бүддьүөт туолуутун хаамыытын көрдүбүт. Бу былырыын киллэриллибит саҥа көрүҥ, ол чэрчитинэн дохуот киириитин уонна ороскуоттар тустарынан норуот дьокутааттарыгар хайдах туруктаахпытын отчуоттуубут», — диэтэ Иван Алексеев.
Үп миниистирин эбээһинэһин толорооччу Саха сиригэр бэйэ дохуоттарыгар барыларыгар бигэ киирии бара турарын, оттон сорох нолуок киириилэригэр былаан аһара туолбутун бэлиэтээтэ.
«Маныаха өйдүөххэ наада, нолуок киириитин чааһыгар өрөспүүбүлүкэ экэниэмикэтэ аан дойду экэниэмикэтин кытта ситимнээх. Сир баайын, туһалаах сир баайдарын сыаналара, солкуобай куурса уонна да атын биричиинэлэр — тэрилтэлэр барыстара олортон улахан тутулуктаах. Инньэ гынан сыл бүтүөр диэри сэрэхтэр бааллар, биһиги ону учуоттуубут. Бүддьүөт улахан аҥаара социальнай эйгэҕэ туһуланар, ол — үөрэхтээһин, култуура, успуорт уонна социальнай бэлиитикэ», — диэтэ Иван Алексеев.
