2026 сыл сэтинньи 4 күнүттэн 9 күнүгэр диэри Дьокуускай аан дойдуттан ыалдьыттары көрсүөҕэ. Аан бастаан бэстибээл кыһыҥҥы кэмҥэ ыытыллыаҕа, оттон сүрүн бирииһи — «Кыһыл көмүс хаар ачыкыны» — дьиҥнээх Саха сирин усулуобуйатыгар туттарыахтара.
Тэрээһини тэрийээччи, «Сахафильм» киинэ хампаанньатын салайааччыта Алексей Егоров бэлиэтииринэн, кыһыҥҥы көрүҥ бэстибээл сүрүн тиэмэтин — киһи уонна айылҕа бииргэ буолууларын — арыйарга кыах биэриэҕэ. «Аан бастаан бэстибээл кыһыҥҥы Дьокуускайга ыытыллыаҕа. Биһиги аан дойдуттан кэлбит ыалдьыттарбыт өрөспүүбүлүкэбит кэрэтин, айылҕабыт уонна ыарахан усулуобуйаҕа олорор, киинэни айар дьоммут уратытын көрүөхтэрэ», — диэн кини бэлиэтээтэ.
Бырагыраамаҕа: уһун метражтаах киинэ сүрүн күрэҕэ, анал көрдөрүүлэр, дьыалабыай уонна үөрэх бырагыраамалара, айар көрсүһүүлэр уонна маастар-кылаастар.
Казахстантан, Монголияттан, Кытайтан, Арассыыйаттан уонна Саха сириттэн дьүүллүүр сүбэ «Кыһыл» уонна «Үрүҥ көмүс хаар ачыкылар» хаһаайыттарын быһаарыахтара. Саха киинэлэригэр кыайыылааҕы көрөөччүлэр талыахтара.
Арассыыйа Бэрэсидьиэнэ Владимир Путин Илиҥҥи экэнэмиичэскэй пуорумҥа креативнай экэниэмикэ уонна киинэ Уһук Илин уонна Арктика куораттарыгар сайдан эрэллэрин бэлиэтээбитэ. Чуолаан, Дьокуускайга «Үлэ кыбаартала» креативнай кластер үлэлиир, оттон итинник эбийиэктэр Улан-Удэҕэ, Благовещенскайга уонна Владивостокка тутуллаллар.
