Уһук Илин эрэгийиэннэригэр инфраструктура кирэдьиитин ньыматын олоххо киллэриини РФ Бырабыыталыстыбатын бэрэссэдээтэлин солбуйааччы Марат Хуснуллин кыттыылаах сүбэ мунньахха көрдүлэр. Вице-премьер бэлиэтээбитинэн, 2022 сылтан бу өйөбүл көмөтүнэн Уһук Илиҥҥэ оскуолалары, оҕо уһуйааннарын, поликлиникалары, успуорт тэрилтэлэрин уонна суолу киллэрэн туран, 200-тэн тахса эбийиэк тутуллан бүппүт.
«Казначейство инфраструктураҕа кирэдьиитэ эрэгийиэннэргэ базовай инфраструктураны тутууну түргэтэтэргэ кыаҕы биэрэр. Үбүлээһин социальнай уонна экэниэмикэни сайыннарарга усулуобуйаны тэрийэр эбийиэктэргэ эрэ ыытыллар: тырааныспарка, социальнай уонна коммунальнай эйгэлэргэ», — диэн эрдэ Саха сирин баһылыга Айсен Николаев бэлиэтээбитэ.
Саха сиригэр бүгүҥҥү күҥҥэ 12 эбийиэккэ үлэ толору бүтэн турар. Тутуллан үлэҕэ киирбит эбийиэктэр истэригэр Дьокуускай куорат «Спортивнай» түөлбэтигэр 240 миэстэлээх оҕо уһуйаана уонна элбэх хайысхалаах успуорт саалата, Жатайга олорор дьиэ, «Звезднай» түөлбэҕэ гаас хочуола уонна хомунаалынай ситимнэр буолаллар.
Маны таһынан, үп дьону таһар тырааныспары саҥардыыга ыытыллыбыта, 53 саҥа оптуобус кэлбитэ, ону тэҥэ, Өрөспүүбүлүкэ болуоссатын, Сайсары күөл уонна Роман Дмитриев аатынан кытыллары тупсаран оҥоруу барбыта.
Инфраструктура кирэдьиитинэн Саха сиригэр барыта 30 бырайыагы олоххо киллэрэр былааннаахтар. Билигин Жатайга 200 миэстэлээх уопсай дьиэни, «Звезднай» түөлбэҕэ 315 миэстэлээх оҕо уһуйаанын тутуу уонна киин куоракка суол ситимин саҥардыы салҕанар.
Инфраструктура кирэдьиитин бырагырааматын РФ Тутууга министиэристибэтэ сүрүннүүр, оттон бырайыактары арыаллааһыны Территориялары сайыннарар пуонда толорор. Бу туһунан Ил Дархан уонна Бырабыыталыстыба пресс-сулууспата суруйар.
