Балаҕан ыйын 30 күнүгэр Дьокуускайга «КиноМАНиЯ» бэстибээл кыттыылаахтара кылгас киинэлэрин улахан экраҥҥа көрдөрдүлэр. 57 оскуола үөрэнээччитэ, хамаандаларга арахсан, 10 күн иһигэр саха киинэтин индустриятын тутаах бэрэстэбиитэллэриттэн үөрэнэн, киинэ оҥоруутун толору билиитин аастылар.
«КиноМАНиЯ» үөрэх бырайыага 8 — 11 кылаас үөрэнээччилэригэр бэһис төгүлүн ыытылынна. Онно Дьокуускай, Чурапчы, Уус Алдан, Мэҥэ Хаҥалас, Бүлүү уонна Мииринэй улуустарыттан сылдьар оҕолор кытыннылар.
Кыттааччылар саха киинэтин индустриятын тутаах профессионалларыгар: Анна Захароваҕа, Алексей Амбросьевка-кыраҕа, Анастасия Пительга уо.д.а. маастар-кылаас аастылар. «Сахафильм» салайааччыта Алексей Егоровы кытта кэпсэттилэр. Ааспыт сыллардааҕы бэстибээллэртэн уратыта быйыл бырагыраама салайааччытынан уонна киинэ устуутугар кураторынан биллиилээх режиссер Ларри Яковлев буолла.
Биэс күн устата 8-9 киһилээх хамаандалар бэйэлэрин киинэлэрин устан, «Лена» киинэ тыйаатырыгар көрдөрдүлэр уонна рекламатын айдылар. Оҕолор режиссердар, оператордар, сценаристар, артыыстар, таҥыы режиссердара, тыас-уус орежиссердара уонна туруорааччы худуоһунньуктар оруолларыгар холонон көрдүлэр.
«Оҕолор Саха сирин билимин дьоҕус академиятын базатыгар олордулар, үөрэннилэр, киинэлэрин уһуллулар. Академия тиэргэнигэр, лабораторияларыгар, уопсайдарыгар, оранжереяларыгар эрэ буолбакка, Өлүөнэ өрүс кытылыгар, дроннартан уонна Чапаево сэлиэнньэҕэ үлэлээтилэр. Оскуола оҕолорун өйүктэрэ питчинг аастылар уонна биһиги экспертэрбит көмөлөрүнэн кылгас киинэлэрин оҥорор кыахтаннылар. Оҕо креативнай индустриятын сайыннарыыга сылын аайы үөрэх бырагырааматыгар саҥа маастар-кылаастары, өйүктэри уонна ураты уопуту туһанабыт. Холобур, быйыл кыттааччылар хамаандаларыгар үлэни тэрийэр иккис режиссер оруола баар буолла. Оҕолор инникитин киинэ индустриятыгар идэни ыллахтарына үөрүөхпүт», — диэн билим дьоҕус академиятын үрдүкү методиһа Любовь Попова кэпсээтэ.
Бэстибээл кыттыылаахтара «Папа поневоле» кэмиэдьийэни, «Чужими глазами» драманы, «Тревога с первых слов» драманы, «Билгэ» этно-мистик-хоррору, «Пересдача» кэмиэдьийэни, «Объект» психологическай триллеры уонна «Вера» драманы уһуллулар. Номинация кыайыылаахтара успуонсардартан, тэрийээччилэртэн бэлэх сэртипикээттэри уонна өйдөбүнньүк бириистэри туттулар.
Тылбаас: Эрчимэн Шамаев
