«Россия кэрэ куота-2026» күрэскэ Саха сирин Юлия Денисова көрдөрүөҕэ. 18 саастаах кыыс Дьокуускайга Креативнай индустриялар кэллиэстэригэр үөрэнэр.
Быйыл Юлия «Туймаада Куо» кырасаабыссалар уонна талааннаахтар күрэстэригэр кыттыбытын бэлиэтиибит. Үөрэҕин таһынан кыыс моделингынан дьарыктанар.
«Куоҥкуруһу оҕо эрдэхпиттэн кэтээн көрөбүн. Кыттааччылары көрөн, күрэс далааһынын сөҕөн, биирдэ эмэ бэйэм бу история сорҕото буолуом диэн санаан да көрбөт этим. Бүгүн таптыыр халлаан күөх өҥнөөх көстүүммүн туттум. Сахабыт сиригэр уонна бу үөрүүнү тэҥҥэ үллэстэр хас биирдии киһиэхэ улахан эҕэрдэбин ыытабын. Эһиги аттыбар бааргытыгар махтал», – диэн Юлия Денисова социальнай ситимҥэ суруйда.
«Россия кэрэ куота — 2026» күрэс түмүктүүр түһүмэҕэ ахсынньы 12 күнүгэр «Барвиха Luxury Village» кэнсиэртиир саалатыгар буолуоҕа.
Санатар буоллахха, былырыын куонкуруска Саха сирин Валентина Михайлова көрдөрбүтэ. Саха кыыһа финалга киирбит 20 бастыҥ иһигэр киирбитэ.
