Горнай улууһугар саҥа гаас саппаастаах сири буллулар. Билигин миэстэтигэр геологическай-чинчийэр үлэлэр ыытыллаллар, диэн СИА иһитиннэрэр.
Саппаастаах сир Горнай улууһун Малтааны, Маҕаны нэһилиэктэрин территориятыгар, Бүлүү улууһун кытта быысаһар сиригэр баар.
«Былырыын аукциоҥҥа «Газпром недра» хампаанньа кыайбыта. Билигин онно геологическай-чинчийэр үлэлэр ыытыллаллар. Билигин кини саппааһын уонна кыаҕын туһунан дааннай суох. Геологическай-чинчийэр үлэлэр бүттэхтэринэ бу информация баар буолуо диэн эрэнэбит. Саппаастаах сири баһылааһын Горнай улууһугар бырамыысыланнаһы сайыннарыыга төһүү күүһүнэн буолуоҕа», — диэн Горнай улууһун баһылыгын бастакы солбуйааччы Сардана Стручкова кэпсээтэ.
Горнай улууһун Октябрьскай нэһилиэгин таһыгар 200-чэ киһиэхэ аналлаах вахтовай бөһүөлэги тутар былааннаахтар. Улуус баһылыгын бастакы солбуйааччы этэринэн, онно саҥа саппаастаах сиргэ геологическай-чинчийэр үлэҕэ кыттар исписэлиистэр олоруохтара.
«Быйыл улууска эбии үс нэһилиэнньэлээх пууну гаастаатылар. Бэрдьигэстээххэ быйыл олорор дьиэлэри уонна социальнай эбийиэктэри гааска холбоотулар. 2027 сылга нэһилиэк барыта гаастаныа диэн былаанныыбыт», — диэн Сардана Стручкова эбэн эттэ.
