Тыва национальнай оркестра Дьокуускайга федеральнай «Биһиги — Арассыыйа» бырагыраама чэрчитинэн кэнсиэртиир. Кэлэктиип «Көс олох дорҕоонноро» диэн бырагырааманы көрдөрүөҕэ.
«Көс олох дорҕоонноро» кэнсиэртиир бырагыраама — бу көс култуура эйгэтигэр муусуканан айан, манна былыргы үгэстэр национальнай үнүстүрүмүөннэр тыастарыгар уонна тойук (хоомей) ускуустубатыгар тиллэн кэлэллэр. Аата да этэринэн, сүрүн идиэйэтэ — дорҕоон, бу Тыва сирин дууһата уонна сүрэҕин тэбиитэ, манна ат үөрэ туйаҕын тыаһынан ыһыллар, ойуун дүҥүрэ өбүгэлэр дууһаларын ыҥырар, ыллыыр үрэхтэр кистэлэҥ кэпсээннэрин илдьэ усталлар, оттон дириҥ үгэстэр хас биирдии дорҕоонтон кутуллаллар.
Бырагыраамаҕа тыва композитордарын айымньылара уонна норуот ырыалара биир ситимҥэ холбоһоллор. Саамай чаҕылхай нүөмэрдэр истэригэр — С. Лудуп «Каптагай» («Вселенная») диэн философскай хартыыната, төрөөбүт дойду уонна көс киһи суолун туһунан норуот матыыптара, саамай күндү уобарастар тустарынан лирическэй ырыалар, ону тэҥэ духуобунай нэһилиэстибэҕэ анаммыт айымньылар: Н. Куулар «Сыгыт, хоомей» («Хоомей төрүт дойдута»), О. Тюлюш «Кожээлер» («Таас бэлиэлэр»). Бырагырааманы чаҕылхай, олоҕу өрө тутар айымньылар түмүктүүллэр, олор истэригэр виртуознай «Дурген чугаалар» («Тыва чабырҕаҕа») уонна «Аа-шуу декей-оо» («Табыллыы ырыата») — көс олоҕун бүтэһик дорҕооно, олох уонна инники диэки хамсааһын өрөгөй ырыата буолан иһиллэр.
Сэтинньи 13 күнүгэр 18:30 чааска «Саха — Тыва — үйэлэр дорҕоонноро» диэн холбоһуктаах кэнсиэр буолуоҕа, Тыва национальнай оркестрын уонна С. А. Зверев — Кыыл Уола аатынан Саха Өрөспүүбүлүкэтин Үҥкүү национальнай тыйаатырын национальнай үнүстүрүмүөннэрин оркестра кыттыахтара. Ыытыллар миэстэтэ: Саха Өрөспүүбүлүкэтин Судаарыстыбаннай циркэтэ.
Сэтинньи 14 күнүгэр 17:00 чааска «Көс олохр дорҕоонноро» диэн Тыва национальнай оркестрын кэнсиэртиир бырагыраамата буолуоҕа. Ыытыллар миэстэтэ: А. Е. Кулаковскай аатынан Норуоттар доҕордоһууларын дьиэтэ.
