Саха сирин эдэр ыччат дьыалаларыгар уонна социальнай коммуникацияларга министиэристибэтигэр Саха сирин баһылыгын гражданскай уопсастыбаны сайыннарыыга граанын күрэҕин түмүктэрин таһаардылар. Кыайыылаахтарынан 44 кэмиэрчэскэйэ суох тэрилтэ билиннэ. Күрэххэ уопсайа 207 сайаапка киирбит.
«Кыайыылаахтары эҕэрдэлиибит уонна бары кыттааччыларга көҕүлээһиннэрин иһин уонна эрэгийиэн сайдыытыгар кылааттарын иһин махтанабыт. Өйөммүт бырайыактар ордук элбэх ахсааннара — 18 — Дьокуускай куораттан бэриллибит. Ону тэҥэ кыайыылаахтар ахсааннарыгар Ньурба улууһуттан сэттэ НКО, Нам улууһуттан түөрт, Горнай уонна Чурапчы улуустарыттан үстүү бырайыак, Үөһээ Бүлүү улууһуттан икки, ону тэҥэ Эдьигээнтэн, Мэҥэ Хаҥаластан, Нерюнгриттан, Сунтаартан, Тааттаттан, Уус Алдантан уонна Хаҥаластан биирдии бырайыак киирдэ», — диэн эдэр ыччат министиэристибэтигэр иһитиннэрдилэр.
Бэлиэтэммит көҕүлээһиннэртэн биирдэстэрэ «Сарсыҥҥыга үтүө» бырайыак буолла, Ньурба улууһуттан, «Көҥүл өттүнэн (волонтерскай) үлэни сайыннарыы» хайысхаҕа кыайбыт. Бу бырайыагы олоххо киллэриигэ «Дьулуур» АНО, Ньурба улууһун Култуура уонна эдэр ыччат бэлиитикэтин департаменын эдэр ыччат бэлиитикэтин салаата 3 мөл 258 тыһыынча солкуобайы ылыаҕа. Бырайыак сыала — саҥа саҕалааччы волонтердарга систиэмэлээх өйөбүлү тэрийии, кинилэри үөрэтэр инфраструктураны тэрийии уонна ыччаты өрөспүүбүлүкэ социальнай суолталаах бырайыактарыгар кытыннарыы.
«Саха сирин баһылыга Айсен Николаевка уонна күрэх тэрийээччилэригэр биһиги көҕүлээһиммитин үрдүктүк сыаналаабыттарыгар махтанабыт. Иннибитигэр улахан үлэ күүтэр, уонна биһиги «Сарсыҥҥыга үтүө» сүүһүнэн кыһалҕалаах дьоҥҥо эрэллээх тирэх буолуоҕар эрэнэбит», — бырайыак ааптардара тиэрдэллэр.
Кыайбыт бырайыактар 2026 сыл сэтинньи 1 күнүттэн олоххо киирэн барыахтара: судургу НКО-ларга 12 ый устата, оттон уопсастыбаннай туһалаах өҥөлөрү оҥорооччулар реестрдэригэр киирбит тэрилтэлэргэ 24 ыйга диэри.
Санатан эттэххэ, граан күрэҕэ 2020 сылтан өрөспүүбүлүкэ баһылыга Айсен Николаев ыйааҕынан ыытыллар уонна социальнай суолталаах көҕүлээһиннэри өйүүр бэлиэ инструменынан буолла. Билиҥҥи күрэх граан пуондатын уопсай суумата 40 мөл солкуобайтан тахса.
Саха сирин баһылыгын граанын күрэҕин элбэх хайысхалара Арассыыйа бэрэсидьиэнэ Владимир Путин көҕүлээһининэн олоххо киирэр «Эдэр ыччат уонна оҕолор» национальнай бырайыак сыалларыгар уонна соруктарыгар эппиэттииллэр.
