«Саха сири соҕуруута» түргэнник сайдар территория (ТОР) резиденин статуһун урбаанньыт Заур Касумов ылла. Кини Нерюнгри оройуонун Беркакит бөһүөлэгэр сезонунан URASA глэмпинг бырайыагын олоххо киллэрэр былааннаах.
Туристическай комплекс сиригэр геокупол, сафари-тент уонна олорорго аналлаах инфраструктуралаах үс балаакка муодула, ону тэҥэ беседкалар, ыйанан турар ороннор, шашлык оҥорор сирдэр уонна атын көхтөөх сынньалаҥ эбийиэктэрэ баар буолуохтара. Бу бырайыагы Уһук Илин уонна Арктика сайдыытын корпорацията (КРДВ) кытта сөбүлэһии чэрчитинэн олоххо киллэрэллэр уонна «Саха сирин соҕуруута» ТОР бастакы туристическай эбийиэгинэн буолар.
«Нерюнгри оройуона, бастатан туран, чоҕунан уонна бөдөҥ тэрилтэлэринэн биллэр, ол эрээри биһиэхэ дьикти айылҕалаахпыт. Талбыт учаастакпыт бэс уонна тиит мастар быыстарыгар баар, ону таһынан аттыгар сайын сөтүөлүүр уулаах сир баар. Дьон манна элбэхтик үлэлиир, оттон дьиэ таһыгар табыгастаахтык айылҕаҕа сынньанар сир суоҕун кэриэтэ. Маннык миэстэни биһиэхэ тэрийиэхпин уонна Саха сирэ соҕуруу өттө бырамыысыланнаһынан эрэ буолбакка, сынньалаҥынан эмиэ интэриэһинэй буолуон сөбүн көрдөрүөхпүн баҕардым. Биһиги түөрт сынньанар эбийиэги тэрийиэхпит, ол 20 ыалдьыты тэҥинэн ылар кыаҕы биэриэҕэ. Үлэ сезонун ыам ыйыттан балаҕан ыйыгар диэри былаанныыбыт. Ыалдьыттар табыгастаахтык сынньаналларын туһугар комплекс сиригэр шашлык оҥорор сирдэр, беседкалар, ыйанан турар ороннор уонна гамактар баар буолуохтара, ону тэҥэ теннис остуоллара көрүллүөхтэрэ», — диэн урбаанньыт Заур Касумов кэпсээтэ.
ТОР резиденин статуһун көмөтүнэн Касумов комплексы кылгас болдьоххо үлэҕэ киллэрэр уонна кинини кэҥэтиигэ күүһүн уурар былааннаах, чуолаан SUP-доскалары уонна квадроцикллары уларсар өҥө көрүҥүн кэҥэтиигэ, ону тэҥэ баанньык комплексын тэрийиигэ.
