Саха Өрөспүүбүлүкэтин Сыана бэлиитикэтигэр судаарыстыбаннай кэмитиэтэ олох-дьаһах өҥөтүн төлөбүрэ үрдүүрүн туһунан официальнай быһаарыыны таһаарда.
РФ бырабыыталыстыбатын дьаһалынан, 2027 сылга Саха сиригэр олох-дьаһах өҥөтүн төлөбүрэ ортотунан 18,9% үрдүүрэ быһаарылынна. Муниципальнай тэриллиилэргэ муҥутуур көҥүллэнэр халбаҥнааһын 8,1% тэҥнэһэр. Ол эрэн, дьиэ хайдах тупсаҕай оҥоһуулааҕыттан көрөн, биирдиилээн олорор дьиэлэргэ төлөбүр үрдээһинэ 27% куоһарыа суохтаах — онон бары муниципалитеттарга муҥутуур үрдээһин 27% олохтоммут.
Холобур, Дьокуускай куоракка 63 кв. м иэннээх олорор дьиэҕэ олорор үс киһилээх дьиэ кэргэн төлөбүрэ ортотунан 18,7% үрдүөҕэ. Толору хааччыллыылаах дьиэҕэ, биэс уонна онтон үөһээ этээстээх — 17,6%, биир этээстээх дьиэҕэ — 20,4%, аҥардастыы толору хааччыллыылаах икки этээстээх 48 кв. м иэннээх дьиэҕэ — 21,6%, хааччыллыыта суох гааһынан оттуллар 90 кв. м иэннээх дьиэҕэ — 11,6%, кирпииччэ оһохтоох дьиэҕэ — 11,4%.
Тэрилтэ бэлиэтииринэн, индекс диэн уопсай көрдөрүү буолар, ол аата квитанция хас биирдии устуруоката тэҥник үрдүүр диэн буолбатах. Түмүк суума өҥө көрүҥүттэн, дьиҥнээх туһаныы кээмэйиттэн уонна бигэргэммит тарыыптартан тутулуктаах. Индексация төлөбүр докумуонун көҥүллэнэр чааһыгар эрэ дьайар: ититиигэ, ууга, ууну ыытыыга, уокка, гааска уонна бөҕү таһаарыыга.
Ититиигэ тарыыптар туһанааччыларынан биир кэлимник олохтоноллор, ол эрэн өрөспүүбүлүкэ үгүс олохтооҕо ититиини судаарыстыбаттан субсидияланар чэпчэтиилээх тарыыптарынан төлүүр. Чэпчэтиилээх тарыыптар 2014 сылтан дьиэ этээһин ахсаанынан олохтоммуттара. Алтынньы 1 күнүттэн этээһинэн тарыып араастаһыыта 5% кыччаабыт.
Субсидия ааҕыныстыбатын төлөпүөнэ: 8 800 222-50-70.
