Көҥүл тустууга аан дойдутааҕы чөмпүйэнээккэ Саха сирин тустууга оскуолатын биэс иитиллээччитэ кыттарга бэлэмнэнэр. Быйылгы сүрүн күрэхтэһии бу күннэргэ Астанаҕа буолар, ЯСИА иһитиннэрэр.
Бастакынан Георгий Окороков (Австралия) 61 кг диэри ыйааһыҥҥа тустар. Киниэхэ сүүмэрдиир түһүмэх бээтинсэҕэ, Дьокуускай бириэмэтинэн 14:30 чаастан саҕаланар.
Атыттар бары субуотаҕа күрэхтэһиэхтэрэ. 57 кг диэри ыйааһыҥҥа Европа чөмпүйүөнэ Владимир Егоров (Македония), Азия оонньууларын боруонса призера Айаал Белолюбскай (Таджикистан) уонна 2021 сыллааҕы аан дойду чөмпүйэнээтин үһүс призера Арыйан Тютрин (Беларусь) тахсыахтара. Ону таһынан 74 кг диэри ыйааһыҥҥа Азия оонньууларын призера Виктор Рассадин (Таджикистан) кыттар.
Кинилэргэ сүүмэрдиир түһүмэхтэр субуотаҕа 14:30 чааска былааннаналлар. Финал ортото 20:30 чааска буолуоҕа. Уоскутар хапсыһыылар баскыһыанньаҕа 20:30 чааска, оттон финаллар 22:00 чааска ыытыллыахтара.
