СӨ Судаарыстыбаннай Мунньаҕын (Ил Түмэн) бэрэссэдээтэлэ Алексей Еремеев РФ Федерациятын Сэбиэтин бүддьүөт-нолуок бэлиитикэтин уонна РФ субъектарын бүддьүөттэрин хааччыйыы боппуруостарыгар аналлаах мунньахха кытынна, суруйда Саха парламент саайт.
Эрэгийиэннэргэ сайдыы тутаах приоритеттарын дьүүллэһии кэмигэр Федерация Сэбиэтин бэрэссэдээтэлэ Валентина Матвиенко бүддьүөттэр икки ардыларынааҕы трансфертар тиһиктэрин тупсарыы уонна РФ субъектарыгар административнай ноҕуруусканы аччатыы наадалааҕын туһунан эттэ.
Эрэгийиэннэр бүгүн федеральнай үп-харчы өйөбүлүн ылалларыгар аһара элбэх ирдэбил туруорулларыттан сылтаан суолталаах бырайыактары олоххо киллэрэллэригэр уустуктары көрсөллөрө ыйылынна.
«Бу систиэмэни тупсарары толкуйдуохха наада — биир өттүнэн нассынаалынай сыалы-соругу толорорго тутаах хайысхалары сүтэрбэккэ, иккис өттүнэн эрэгийиэннэр үтүмэн отчуоттарга тимирэн хаалбаттарын туһугар», — диэтэ Валентина Матвиенко. Ону тэҥэ, эрэгийиэннэр нассынаалынай сыалы-соругу ситиһэллэригэр чопчу уонна өйдөнүмтүө мэхэньиисимнэр баар буолуохтаахтарын эттэ. Итини сэргэ Федерация Сэбиэтин бэрэссэдээтэлэ «хааччыллыбатах мандааттар» диэн сытыы кыһалҕа бааран көтөхтө, ол эбэтэр эрэгийиэннэргэ сөптөөх үбүлээһини биэрбэккэ эрэ эбии боломуочуйалар сүктэриллэллэрэ ыйылынна. «Федерация субъектарын үп-харчы өттүнэн кыттыыларын ирдиэн сөптөөх федеральнай биэдимистибэлэр ылынар ханнык баҕарар быһаарыылара хайаан да эрэгийиэннэр бүддүөттэригэр хайдах-туох дьайыахтааҕа эрдэттэн ырытыыны, дьүүллэһиини ааһыахтаах», — диэтэ Валентина Матвиенко.
Кини РФ Үбүн министиэристибэтэ федеральнай бүддьүөт интэриэһин өрүү күүскэ туруулаһарын курдук эрэгийиэннэр бүддьүөттэригэр эмиэ итинник сыһыан баар буолуохтааҕын бэлиэтээтэ.
Оттон Саха Сирэ Арассыыйаҕа саамай улахан сирдээх-уоттаах, уустук суоллааҕынан-иистээҕинэн биллэр, итинтэн сылтаан бары хайысхаларга улахан ороскуоту көрсөр. Ол иһин федеральнай быһаарыылар сабыдыалларын объективнай сыаналааһын стратегическай суолталаахтар.
Ил Түмэн бэрэссэдээтэлэ Алексей Еремеев бу да иннинэ субсидияны уонна дотацияны түҥэтиигэ хоту уонна аартыка уратылара учуоттаныллыахтааҕынн туһунан хас да эппитэ, ону тэҥэ үбү муниципальнай оройуоннарга түргэнник тиэрдэргэ бюрократическай мэһэйдэри аччатыы наадатын тоһоҕолоон бэлиэтээтэ.
Федерация Сэбиэтин, РФ Бырабыыталыстыбатын уонна эрэгийиэннэр парламеннарын холбоһуктаах эрэкэмэндээссийэлэрин оҥорууга үлэ салҕанар.
