Арассыыйа Бэрэсидьиэнэ Владимир Путин «Валдай» норуоттар икки ардыларынааҕы дьүүллэһэр кулууп мунньаҕар Уһук Илин сайдыытыгар сиһилии тохтоото.
Өйөбүл дьаһалларын бииргэ холбооһуну Путин уларыйыы сүрүн төрүттэриттэн биирдэстэринэн ааттаата. 2027 сыл тохсунньу 1 күнүттэн Уһук Илиҥҥэ биир кэлим чэпчэтиилээх эрэсиими киллэрэр былааннаахтар. Бу эрэсиим макрорегион бүттүүнүгэр, ол иһигэр Саха сиригэр үлэлиэҕэ.
«Биһиги чэпчэтиилэр тиһиктэрин толору оҥордубут уонна кэлэр сыл тохсунньу 1 күнүттэн — биһиэхэ бу урут суох быһаарыы — биһиги урут оҥоһуллубут бары дьаһаллары холбоон, Уһук Илин үгүс өттүгэр биир чэпчэтиилээх эрэсиими олохтуохпут», — диэтэ Владимир Путин.
Владимир Путин этэринэн, ураты усулуобуйалар Уһук Илиҥҥэ Арассыыйа уонна омук инвестордарын тардарга көмөлөһөллөр.
«КРДВ Саха сирэ» иһитиннэриитинэн, «Саха сирэ», «Соҕуруу Саха сирэ» ТОР-дар, РФ Арктикатын зонатын резиденнэрин эрэсиимин көмөтүнэн Саха сиригэр 51 тэрилтэ үлэҕэ киирдэ, өрөспүүбүлүкэ экэниэмикэтигэр 280 млрд солкуобайтан тахса үп тардылынна уонна 11 тыһ. саҥа үлэ миэстэтэ таҕыста.
«Саха сирэ» ТОР эрэсиимин чэпчэтиилэрин туһанар бырайыактартан «Саюри» сылы эргиччи үлэлиир тэпилииссэ комплексаны, Уһук Илиҥҥэ бастакы «Үлэ Кыбаартала» креативнай кластеры, саҥардыллыбыт Жатайдааҕы суудуна верфэтин, Аллараа Бэстээх бөһүөлэгэр таһаҕас терминалын бэлиэтиэххэ сөп. «Соҕуруу Саха сирэ» ТОР эрэсиимин өйөбүлүнэн чоҕу хостуурга уонна үрдүк хаачыстыбалаах чох концентратын оҥорорго аналлаах улахан инвестиционнай хайа-геологическай бырайыактар — «Инаглинскай» уонна «Денисовскай» хайа-байытар комплекстар олоххо киирэллэр. АЗРФ эрэсиимин өйөбүлүнэн «Янзолото» уонна «Янолово» хампаанньалар бырайыактара олоххо киирдилэр.
