Саха Өрөспүүбүлүкэтин Ил Дархана Айсен Николаев сэтинньи 9 күнүгэр Василий Егоровы Ыччат дьыалаларыгар уонна социальнай коммуникацияларга миниистиринэн аныыр туһунан ыйааҕа таҕыста.
Василий Егоров үрдүк үөрэхтээх. Кини Чурапчытааҕы судаарыстыбаннай физическэй култуура уонна успуорт институтун «физическэй култуура» идэтин уонна М.К. Аммосов аатынан Хотугулуу-Илиҥҥи федеральнай университеты «юриспруденция» идэтин бүтэрбитэ.
Саха Өрөспүүбүлүкэтин сүүмэрдэммитр хамаандаларын успуорка бэлэмниир өрөспүүбүлүкэтээҕи кииҥҥэ спортсмен-инструктор дуоһунаһыттан үлэтин саҕалаабыта.
Василий Егоров — Арассыыйа биэс төгүллээх чөмпүйүөнэ, Европа икки төгүллээх чөмпүйүөнэ, Аан дойду чөмпүйэнээтин үрүҥ көмүс призера, Саха Өрөспүүбүлүкэтин Бокс федерациятын бэрэссэдээтэлин солбуйааччы, Арассыыйа Федерациятын үтүөлээх маастара.
Миниистиринэн ананыар диэри 2025 сыл балаҕан ыйыттан Саха Өрөспүүбүлүкэтин сүүмэрдэммит хамаандаларын успуорка бэлэмниир өрөспүүбүлүкэтээҕи киин успуорт хамаандатын тириэньэринэн үлэлээбитэ.
