Саха сирин экологияҕа министиэристибэтэ көҥүлэ суох бултааһыны уонна булт сокуонун кэһиини утары охсуһуу былааныгар мэлдьи профилактическай үлэ ыытыллар. Сыл саҕаланыаҕыттан булт иниспиэктэрдэрэ 300-тэн тахса сокуону кэһиини буллулар. Быраабы араҥаччылыыр уорганнар туйахтаахтары сокуоннайа суох бултааһын чахчытынан үс холуобунай дьыала тэрилиннэ. Бу туһунан бүгүн «Саха сирэ» НИКХ «Тэтим» араадьыйаҕа «Былааһы кытта кэпсэтии» биэрии быһа эпииригэр өрөспүүбүлүкэ экологияҕа, айылҕаны туһаныыга уонна ойуур хаһаайыстыбатыгар миниистрэ Евгений Перфильев кэпсээтэ.
«Профилактическай уонна кэтээн көрөр дьаһаллар тиһигин быспакка ыытыллаллар. Сыл саҕаланыаҕыттан булт сокуонун, ону таһынан булт сэбин туһунан сокуону кэһээччилэр 300-тэн тахса киһи боротокуолланна. Холобур, булт саатын тиэйии, туһаныы быраабылаларын кэһии. Киһи массыынаҕа иитиилээх саа тутан олорор буоллаҕына, браконьер буолбатах, ол гынан баран, булт туһунан сокуону уонна сааны туттуу туһунан сокуону кэһэр. Бу ордук тарҕаммыт кэһии.
Ону таһынан быйыл быраабы араҥаччылыыр органнар туйахтаахтары сокуоннайа суох бултааһын чахчытынан үс холуобунай дьыала тэрилиннэ», — диэтэ Евгений Перфильев.
Онуоха миниистир кэлиҥҥи кэмҥэ өрөспүүбүлүкэ булчуттара булт уонна булт саатын туттуу эйгэтигэр сокуон нуормаларын тутуһууга ордук эппиэтинэстээхтик сыһыаннаһар буолбуттарын бэлиэтээтэ.
