2027 сылга доруобуйа харыстабылын сайыннарыыга 35,8 млрд солкуобай көрүллүөҕэ, бу иннинээҕи сыллааҕар 2,3 млрд солкуобайынан элбэх. Бу туһунан Дьокуускай куорат 2-с №-дээх балыыһатын кылаабынай бырааһа, Дьокуускай куорат Дууматын дьокутаата Саргылаана Васильева ЯСИА-ҕа иһитиннэрдэ, бу үп салааны салгыы сайыннарыыга уонна федеральнай да, эрэгийиэннээҕи да бырагыраамалары толору олоххо киллэриигэ ананар.
«Уһун уонна көхтөөх олох» национальнай бырайыак чэрчитинэн биһиги ыарыыны эрдэттэн сэрэтиигэ улахан болҕомтону уурабыт. Сыллата 400 тыһыынчаттан тахса Саха сирин дьоно диспансеризацияны ааһар, оҕолорго улахан сэрэтэр бырагыраамалар көрүллэллэр. Сүрэх-тымыр патологиятын, саахар диабетын, С гепатиты уонна онкологияны утары систиэмэлээх охсуһуу салҕанар», — диэн Саргылаана Васильева бэлиэтээтэ.
Дьокуускай куорат Дууматын дьокутаата, өрөспүүбүлүкэ киэҥ сирдээх-уоттаах уонна тыйыс килиимэттээх буолан, мэдиссиинэ көмөтүн тиийимтиэтин боппуруоһа ордук сытыытык турарын тоһоҕолоон эттэ.
«Биһиги ыраах улуустарбытыгар санитарнай авиацияны сайыннарыы уонна суһаллык дьаһанар биригээдэлэри хааччыйыы — бу ороскуот ыстатыйата эрэ буолбатах, бу — олоҕу быыһыыр боппуруос. Уонна бу сорук утумнаахтык быһаарыллар», — диэтэ Саргылаана Васильева.
Билиҥҥи мэдиссиинэ инфраструктуратын тэрийиигэ ураты болҕомто ууруллар.
«Быйыл улахан балыыһа Нам улууһугар уонна быраас амбулаториятын 11 дьиэтэ үлэҕэ киирдэ, өссө биэс амбулатория улуустарга тутуута бүтэр түһүмэҕэр турар. Гагаринскай уокурук олохтоохторо былырыын тутуллубут саҥа СМАРТ-поликлиника усулуобуйатын сыаналаатылар. Соторутааҕыта Мархаҕа саҥа быраас амбулаториятын дьиэтэ аһылынна, манна 2 тыһыынчаттан тахса ыарыһах хаачыстыбалаах көмөнү ылла. Бу үлэ салҕаныаҕа», — диэн Саргылаана Васильева түмүктээтэ, 2027 сыллааҕы бүддьүөт уонна 2028–2029 сыллардааҕы былааннаах кэм дьон доруобуйата бастакы миэстэҕэ турар дьиҥнээх приоритекка олоҕурарын бэлиэтээтэ.
