2026 сыл 10 ыйын устата Саха Өрөспүүбүлүкэтин катастрофа медицинатын киинин эмчиттэрэ 2688 ыарыһахха уонна эмсэҕэлээбит дьоҥҥо, ол иһигэр 338 оҕоҕо көмөлөстүлэр. Ордук элбэх эвакуация хаан эргиирин систиэмэтин ыарыыларыгар, эчэйиилэргэ, уокка сиэтиигэ уонна сүһүрүүгэ сибээстээх. Бу туһунан РБМК пресс-сулууспата иһитиннэрэр.
2026 сыл 10 ыйын устата РБМК санитарнай авиацията ыарахан ыарыһахтары медицинскэй эвакуациялыырга 1735 санитарнай сорудаҕы толордо.
«Ордук элбэх хаан эргиирин систиэмэтин ыарыылаахтар эвакуацияланнылар – 1278 ыарахан ыарыһах, иккис миэстэҕэ эчэйиилээхтэр, уокка сиэппиттэр уонна сүһүрбүттэр – 537 киһи, үһүс миэстэҕэ ас буһарар систиэмэ ыарыылара – 223 ыарыһах. Салгыы – хат буолуу, төрөөһүн уонна төрөөһүн кэннинээҕи кэм – 184 дьахтар, хабах, ууһуур систиэмэ ыарыылара — 94 ыарыһах, тыынар систиэмэ ыарыылара — 90 ыарыһах, ньиэрбэ систиэмэтин ыарыылара — 52 ыарыһах», — диэн РБМК пресс-сулууспата иһитиннэрдэ.
Санитарнай авиация ордук Саха сирин Арктикатыгар уонна ыраах сытар оройуоннарыгар наадалаах, онно улахан ыраах уонна уустук күн-дьыл усулуобуйалара сиринэн тырааныспары туһаныыны уустугурдар. Авиамедица биригээдэлэрэ инфаркт, инсульт, ыарахан эчэйиилээх ыарыһахтарга көмөлөһөллөр, хат дьахталлары уонна саҥа төрөөбүт оҕолору анал медицинскэй тэрилтэлэргэ эвакуациялыыллар.
