«Биһиги дойдубутугар РФ Тыатын хаһаайыстыбатын министиэристибэтэ олоххо киллэрэр «Тыа сирин территорияларын кэлимник сайыннарыы» судаарыстыбаннай бырагыраама үлэлиир. Бу бырагыраама тыа сиригэр олох-дьаһах таһымын үрдэтиигэ уонна толору хааччыллыылаах олорор дьиэ ахсаанын элбэтиигэ ананар. 3%-наах чэпчэтиилээх ипотеканы тыа сиригэр олорор уонна үлэлиир дьон ылыахтарын сөп», — диэтэ Екатерина Стенякина.
Кини этэринэн, чэпчэтиилээх «Тыа сирин ипотеката» — тыаҕа үлэлиир исписэлиис бэйэтигэр уонна дьиэ кэргэнигэр дьиэ туттарыгар эбэтэр атыылаһарыгар биир бастыҥ көмөнөн буолар. Дьокутаат кэпсииринэн, тыа сирин ипотекатын усулуобуйата тыа сирдэригэр, бөһүөлэктэргэ, куораттыҥы тииптээх бөһүөлэктэргэ, кыра куораттарга (30 тыһыынчаҕа диэри нэһилиэнньэлээх) уонна инфраструктурата эрчимнээхтик сайда турар тирэх пууннарга дьиэни эбэтэр кыбартыыраны атыылаһары көҥүллүүр.
Дьокутаат быһаарбытынан, кирэдьиит 25 сылга диэри болдьоххо бэриллэр уонна дьиэни атыылаһар сыанаттан 80 %-гар диэри сабар кыахтаах.
«Маҥнайгы усунуоһу атыылаһааччы бэйэтэ төлүүр, ол эрээри манна судаарыстыба эмиэ көмөлөһөр. Холобур, маҥнайгы усунуоска ийэ хапытаалын харчытын эбэтэр атын социальнай көмө бырагырааматынан дьиэ кэргэҥҥэ көрүллэр субсидияны туһаныахха сөп», — диэн кини эбэн эттэ.
Парламентарий өссө биир усулуобуйаны санатта. Ол курдук, чэпчэтиилээх ипотека кирэдьиитин тыа хаһаайыстыбатыгар эбэтэр тыа сиригэр социальнай эйгэҕэ үлэлиир дьон ылар бырааптаахтар.
«Ол эбэтэр тыа сирин учууталлара, быраастара, пиэрмэрдэр, социальнай үлэһиттэр, култуура дьиэтин, бибилэтиэкэ уонна түмэл үлэһиттэрэ, тириэньэрдэр, бэтэринээрдэр ылыахтарын сөп. Өссө биир категория — АБДь кыттыылаахтара уонна кинилэр кэргэттэрэ. Сайаапка биэрээччилэргэ уопсай ирдэбил баар: ипотеканы ылбытын кэннэ үөһэ этиллибит эйгэлэргэ өссө биэс сыл үлэлиэхтээхтэр. Ол эрээри ити ирдэбил биһиги көмүскээччилэрбитигэр (АБДь кыттыылаахтарыгар), кинилэр кэргэттэригэр уонна огдооболоругар сыһыана суох», — диэн Стенякина бэлиэтээтэ.
