Дьокуускай «Арассыыйа ыччатын киинэ — 2027» аакка хандьыдаат буолар 10 бастыҥ куорат-финалистар испииһэктэригэр киирдэ. Талыллыы бастакы түһүмэҕин түмүгүнэн, өрөспүүбүлүкэ киин куората бу бочуоттаах ааты ылар иһин салгыы киирсэр былааннаах уонна билигин Арассыыйатааҕы куонкурус иккис түһүмэҕэр күүстээхтик бэлэмнэнэр.
«Арассыыйа ыччатын киинэ — 2027» номинация — бу судургу аат буолбатах, бу «Эдэр ыччат кэмэ» диэн Арассыыйатааҕы эдэр ыччат ситиһиилэрин бириэмийэтин иһинэн анал номинация буолар — Арассыыйаҕа ыччат бэлиитикэтин эйгэтигэр сүрүн наҕараадалартан биирдэстэрэ. Бириэмийэ дойдуга Арассыыйа Бэрэсидьиэнэ Владимир Путин сорудаҕынан олоххо киирэр «Ыччат уонна оҕолор» национальнай бырайыак дьаһалларыгар киирэр. Дьокуускайы кытта куонкурус иккис түһүмэҕэр Архангельскай, Улуу Новгород, Иваново, Краснодар, Мурманскай, Нальчик, Сыктывкар, Уфа уонна Ярославль куораттар аастылар.
Иккис түһүмэххэ кыттааччылар «Сайаапка кинигэтин» бэлэмниэхтээхтэр — бу куонкурус сүрүн докумуона. Манна куорат ыччат эйгэтин систиэмэлээхтик уонна чаҕылхайдык көрдөрүөхтээхтэр: куорат ыччата хайдах олорорун, бэйэни сайыннарарга ханнык кыахтар баалларын көрдөрүөхтээхтэр, ону тэҥэ Дьокуускай эдэр көлүөнэ сайдарыгар аналлаах ураты эйгэ быһыытынан арыйыахтаахтар.
«Дьокуускай «Арассыыйа ыччатын киинэ — 2027» аакка хандьыдаат куораттар уон бастыҥнарыгар киирбитэ — бу бүтүн өрөспүүбүлүкэҕэ суолталаах ситиһии. Бу биһиги ыччаппыт үрдүк кыаҕын, кини көхтөөх гражданскай позициятын уонна төрөөбүт дойдутун сайыннарарга дьулуурун бигэргэтэр. Иннибитигэр эппиэтинэстээх түһүмэх — «Сайаапка кинигэтин» бэлэмнээһин күүтэр, манна дьиҥнээх ситиһиилэри, үлэлии турар көҕүлээһиннэри уонна ыччат бэйэтин сайыннарар кыахтарын көрдөрүү улахан суолталаах. Министиэристибэ, Дьокуускай куорат уокуругун дьаһалтата уонна идэлээх тэрилтэлэр куонкурус сайаапкатыгар бииргэ үлэлэрин салгыахтара. Былаас уорганнарын, ыччат холбоһуктарын уонна ыччат бэйэтин күүстэрин холбооһун Дьокуускайы федеральнай таһымҥа дьоһуннаахтык уонна итэҕэтиилээхтик көрдөрөргө кыаҕы биэриэҕэ диэн эрэнэбин», — диэн Саха Өрөспүүбүлүкэтин бырабыыталыстыбатын бэрэссэдээтэлин солбуйааччы Ольга Балабкина бэлиэтээтэ.
Куонкурус түмүктэрэ ахсынньы 19 күнүгэр «Ыччат кэмэ» диэн Арассыыйатааҕы эдэр ыччат ситиһиилэрин бириэмийэтин чэрчитинэн наҕараадалааһын үөрүүлээх сиэригэр-туомугар таһаарыллыахтара. Кыайбыт куорат 2027 сыл устата «Арассыыйа ыччатын киинэ — 2027» ааты сүгүөҕэ. Бу аат федеральнай өйөбүлү тардыыга, киэҥ хабааннаах ыччат бырайыактарын олоххо киллэриигэ, улахан форумнары уонна бэстибээллэри ыытыыга эбии кыахтары арыйыаҕа, ону тэҥэ эдэр исписэлиистэри тардыыга уонна куорат ыччат инфраструктуратын сайыннарыыга төһүү буолуоҕа.
