XII Илиҥҥи экономическай форум 2027 сыл атырдьах ыйын 31 күнүттэн балаҕан ыйын 3 күнүгэр диэри Владивосток куоракка ыытыллыаҕа. Бу туһунан Арассыыйа Бэрэсидьиэнин сүбэһитэ, ВЭФ тэрийэр кэмитиэтин эппиэттээх сэкирэтээрэ Антон Кобяков иһитиннэрдэ. «Илиҥҥи экономическай форум — норуоттар икки ардыларынааҕы таһымнаах тэрээһин. Манна федеральнай уонна эрэгийиэннээҕи былаас бэрэстэбиитэллэрэ урбааны кытта көрсөллөр, биһиги уонна тас дойларбыт сүрүн эспиэрдэрэ, экэнэмиистэрэ уонна социологтара тыын суолталаах кыһалҕалары ырыталлар, бииргэ үлэлэһии ситимнэрэ бөҕөргүүллэр, улахан инвестиция сөбүлэһиилэрэ илии баттаналлар уонна Уһук Илиҥҥэ саамай бөдөҥ оҥорон таһаарыылар үлэлэрэ саҕаланар.
ВЭФ Уһук Илиннээҕи уонна хотугу эрэгийиэннэр сайдыыларын сүрүн инструменнарыттан биирдэстэрэ буолла. Манна чэпчэтиилээх ипотеканы киллэрии уонна салҕааһын, Уһук Илиннээҕи уонна Арктика куораттарын саҥардыы бырагыраамалара, «Гектар» бырагырааманан босхо сир учаастагын биэрии курдук преференциальнай эрэсиимнэр уонна бырагыраамалар ырытыллан ылыллыбыттара — бу барыта Уһук Илин түргэн социальнай-экэнэмиичэскэй сайдыытыгар, ол аата бүтүн дойдубут сайдыытыгар көмөлөспүтэ уонна көмөлөһөр», — диэтэ Арассыыйа Бырабыыталыстыбатын бэрэссэдээтэлин солбуйааччы — Арассыыйа Бэрэсидьиэнин Уһук Илин федеральнай уокурукка боломуочуйалаах бэрэстэбиитэлэ, ВЭФ тэрийэр кэмитиэтин бэрэссэдээтэлэ Юрий Трутнев.
Антон Кобяков этэринэн, ВЭФ кэмигэр Уһук Илин социальнай-экэнэмиичэскэй сайдыытыгар туһаайыллыбыт быһаарыылары ылынарга, инвестициялары тарҕатыыга уонна норуоттар икки ардыларынааҕы бииргэ үлэлэһиини бөҕөргөтөргө сүрүн механизм буолла. «Бүгүн макроэрэгийиэн Арассыыйа Азия-Тиихэй акыйаан эрэгийиэннэрин дойдуларын кытта экэнэмиичэскэй ситимнэрин бөҕөргөтүүгэ улахан оруолу ылар. ВЭФ-2027 бииргэ үлэлэһии саҥа хайысхаларын быһаарарга, кэскиллээх бырайыактары көрдөрөргө, Уһук Илин сайдыытыгар уонна дьон олоҕун хаачыстыбатын үрдэтиигэ эбии күүһү биэриэҕэ диэн эрэллээхпин», — диэн эбэн эттэ Антон Кобяков.
Форум бырагырааматыгар туспа миэстэни 2030 сылга диэри Уһук Илин федеральнай уокурук социальнай-экэнэмиичэскэй сайдыытын Стратегиятын, 2036 сылга диэри барыллааһынын, XI Илиҥҥи экономическай форум түмүгүнэн бигэргэммитин олоххо киллэриини ырытыы ылыаҕа.
ВЭФ 2015 сылтан Арассыыйа Бэрэсидьиэнин Владимир Путин Ыйааҕынан ыытыллар. Форум Владивостокка Уһук Илин федеральнай университет кампуһун былаһааккатыгар буолар. Тэрийээччи — Арассыыйа Бырабыыталыстыбатын өйөбүлүнэн «Росконгресс» пуонда.
