Сэтинньи 4 күнүгэр, Норуот сомоҕолоһуутун күнүгэр, историческай пааркаҕа Бүтүн Арассыыйатааҕы «Россия — Мин историям. Сомоҕолоһуу» бэстибээл чэрчитинэн Улахан этнографическай дьыктаан, айар нүөмэрдэр уонна босхо экскурсиялар ыытыллыахтара.
Бырааһынньыктааҕы бырагыраама 12:00 чааска үөрүүлээх аһыллыыттан саҕаланыа. Тэрээһин ыалдьыттарын хотугу төрүт олохтоох аҕыйах ахсааннаах норуоттар тыйаатырдарын үҥкүү нүөмэрдэрэ уонна атын айар кэлэктииптэр толоруулара көрсүөҕэ. 12:15 чааска «Улахан этнографическай дьыктаан» ыытыллыаҕа.
«Улахан этнографическай дьыктаан» — бу Арассыыйа уонна тас дойдулар олохтоохторугар дойдубутугар олорор норуоттар үгэстэрин, тылларын, устуоруйаларын уонна култуураларын туһунан билии таһымын бэрэбиэркэлииргэ ураты кыаҕы биэрэр. Сыл аайы Саха сирин олохтоохторо бу Аахсыйаҕа көхтөөхтүк кытталлар. 2025 сылга этнографическай билиилэрин таһымын 28 000 тахса киһи бэрэбиэркэлээбит. Быйыл Арассыыйаҕа икки тыһыынчаттан тахса офлайн-былаһаакка, ол иһигэр дойду үрдүнэн 250 тахса ураты уопсастыбаннай былаһаакка регистрацияламмыт. Саха сиригэр икки сүүстэн тахса былаһаакка баара суруллар, сүрүн былаһаакканан А.Е. Кулаковскай аатынан Норуоттар доҕордоһууларын дьиэтэ буолуоҕа.
Кыттааччылар улуу дойдубутугар олорор этностар ураты үгэстэригэр, итэҕэллэригэр уонна олохторугар-дьаһахтарыгар умсугуйар кыахтаныахтара. 2026 сылга аахсыйа сэтинньи 3 күнүттэн 12 күнүгэр диэри ыытыллыаҕа. Аахсыйа чэрчитинэн анал байыаннай дьайыы кыттыылаахтара уонна Арассыыйа норуоттарын бэрэстэбиитэллэрэ «Арассыыйа норуоттарын сомоҕолоһуутун сылыгар» анаммыт ыйытыылары видео көрүҥүнэн Дьыктаан кыттыылаахтарыгар биэриэхтэрэ.
Дьыктаан бүппүтүн кэннэ, 13:00 чааска, баҕалаахтарга паарка мультимедийнай экспозицияларынан — «Рюриковичтар» уонна «Романовтар» — босхо экскурсия тэриллиэҕэ. Манна дьон Арассыыйа судаарыстыбаннаһа сайдыытын суолун батыһыаҕа, улуу династиялар салайар кэмнэрин сүрүн бэлиэ түгэннэрин билиэҕэ уонна үйэлэр тухары дойду сомоҕолоһуута хайдах үөскээбитин көрүөҕэ.
