Саха сиригэр чугастааҕы икки сылга гааска 53 хочуолунайы 17 нэһилиэнньэлээх пууҥҥа көһөрөр былаан баар. Бу сылааһынан хааччыйыы көдьүүһүн үрдэтэргэ уонна тарыыптар икки ардыларынааҕы араастаһыыны толуйууга өрөспүүбүлүкэ бүддьүөтүн ороскуотун аччатарга кыаҕы биэриэҕэ. Бу туһунан «Олох инфраструктурата» национальнай бырайыагы олоххо киллэриигэ анаммыт пресс-кэмпириэнсийэҕэ өрөспүүбүлүкэ олох-дьаһах хомунаалынай хаһаайыстыбатын уонна энергетикатын миниистирэ Вячеслав Емельянов иһитиннэрдэ.
2026 сылга Ленскэй уонна Нерюнгри оройуоттарыгар үс хочуолунай үлэҕэ киирбитэ, сотору кэминэн Өлүөхүмэ улууһугар өссө түөрт хочуолунайы айылҕа гааһыгар көһөрүүгэ үлэни ыытыы былааннанар.
«Өрөспүүбүлүкэ баһылыга Айсен Николаев биһиэхэ хомунаалынайй комплекс тэрилтэлэрин субсидиялааһын ороскуотун аччатар соругу туруорда. Ону быһаарыы сүрүн инструменнарыттан биирдэстэрэ — хочуолунайдары айылҕа гааһыгар көһөрүү уонна сылааһынан хааччыйыы аныгы источниктарын тутуу. Бу сылааһынан хааччыйыы эрэллээх буоларын үрдэтэр эрэ буолбакка, бүддьүөккэ ноҕуруусканы аччатыаҕа», — диэн Вячеслав Емельянов бэлиэтээтэ.
Кэлин биэс сылга Саха сирин хомунаалынай инфраструктуратын модернизациялааһыҥҥа 12 млрд солкуобайтан ордук үп угулунна. Тыырыллыбыт үбүнэн 84 сылааһынан, уунан хааччыйыы уонна олоҕу-дьаһаҕы хааччыйар атын систиэмэлэр эбийиэктэрэ тутулуннулар уонна саҥардылыннылар.
2026 сылга «Коммунальнай инфраструктураны модернизациялааһын» федеральнай бырайыак чэрчитинэн 25 эбийиэги олоххо киллэрии саҕаланна.
Ыытыллар дьаһаллар сүрүннээн баар сылааһынан уонна уунан хааччыйар ситимнэри саҥардыыны кытта сибээстээх. Бэрэсидьиэн Владимир Путин сорудаҕынан бигэргэтиллибит маастар-былааннарга киирбит нэһилиэнньэлээх пууннар инфраструктураларын сайыннарыыга ураты болҕомто ууруллар. Чуолаан, Нерюнгрига быйыл сылааһынан хааччыйар ситимнэри саҥардыыга биэс бырайыак олоххо киириитэ түмүктэнэр. Модернизация сүрүн эбийиэктэриттэн биирдэстэрэ — Уус Алдан улууһун Бороҕон сэлиэнньэтигэр саҥа хочуолунай буолар, бу эбийиэк 2026 сыл бүтүөр диэри үлэҕэ киирэрэ былааннанар. Эбийиэк үлэҕэ киирдэҕинэ, түөрт ньиэп оттуктаах хочуолунайдарын тохтотон, нэһилиэнньэлээх пуун сылааһынан хааччыллыытын эрэллээх оҥоруохха сөп.
Маны сэргэ Нерюнгри куорат уу ханаалын саҥардыы салҕанар. Оҥоһуллар инфраструктура дьаһалларынан өрөспүүбүлүкэ 65 тыһыынчаттан тахса олохтооҕун хомунаалынай хааччыйыы хаачыстыбатын тупсарар былааннаах.
Эбии үбүлээһин источнигынан тардыллыбыт инфраструктура кирэдьиитэ буолуоҕа. Арассыыйа Тутууга уонна ОДьКХ-ҕа министиэристибэтин иһитиннэриитинэн, Саха сиригэр 2027 сылга 1 млрд солкуобайтан тахса суумалаах инфраструктура кирэдьиитин биэрии бигэргэтилиннэ. Бу үп өрөспүүбүлүкэ хомунаалынай инфраструктуратын салгыы сайыннарарга ананар.
