XI «Улахан этнографическай диктант» диэн норуоттар икки ардыларынааҕы сырдатар аахсыйа дойду үрдүнэн 2026 сыл сэтинньи 3 күнүттэн 12 күнүгэр диэри сирэй көрсүһүү көрүҥүнэн ыытыллыаҕа. Саха сирин олохтоохторо өрөспүүбүлүкэ араас улуустарыгар 322 былаһааккаҕа дьыктааны суруйуохтарын сөп. Аахсыйа Арассыыйа норуоттарын сомоҕолоһууларын сылыгар ананар.
«Саха сирэ 2016 сылтан этнографическай дьыктааны ыытыыга сыллата көхтөөхтүк кыттар. 2025 сылга үбүлүөйдээх X улахан этнографическай дьыктааны 22 тыһыынчаттан тахса Саха сирин олохтооҕо суруйбута. Тэрээһин Арассыыйатааҕы гражданскай биир буолууну бөҕөргөтөргө, Арассыыйа Федерациятын норуоттарын култууратын, үгэстэрин уонна устуоруйатын туһунан билиини тарҕатарга, ону тэҥэ нэһилиэнньэ этнографическай билиитин таһымын үрдэтэргэ туһуланар», — диэн Саха сирин тас сибээскэ уонна норуоттар дьыалаларыгар министиэристибэтигэр кэпсээтилэр.
2025 сылга «Якутия» авиахампаанньа көмөтүнэн дьыктааны суруйарга аан бастаан салгын суудунатыгар былаһаакка тэриллибитэ. 2026 сылга эмиэ сэтинньи 4 күнүгэр, Норуот сомоҕолоһуутун күнүгэр, «Дьокуускай — Москва» рейсинэн сөмөлүөккэ дьыктааны суруйуу былааннанар.
Тэрийээччилэр өрөспүүбүлүкэ олохтоохторун аахсыйаҕа кытталларыгар, бэйэлэрин билиилэрин тургутан көрөллөрүгэр уонна мөлүйүөнүнэн Арассыыйа дьонун сомоҕолуур киэҥ хабааннаах бырайыак сорҕото буолалларыгар ыҥыраллар.
