Саха сиригэр 2026 сыл тоҕус ыйыгар баһаартан сэрэхтээх буолууну хааччыйар кэлим былааны толоруу түмүгэ таҕыста. Бу боппуруоска мунньаҕы өрөспүүбүлүкэ бырабыыталыстыбатын бэрэссэдээтэлин бастакы солбуйааччы Николай Бочков ыытта.
Үлэ биир хайысхатынан олорор дьиэлэргэ баһаарынай иһитиннэрээччилэри туруоруу буолар. Бүгүн өрөспүүбүлүкэтээҕи реестрга киллэриллибит 50,5 тыһыынча ыалтан 29 тыһыынчаттан тахса биллэрээччилэринэн уонна атын сигнализация систиэмэлэринэн хааччыллыбыттар. Тэриллэри туруоруу үлэтин салҕаныаҕа.
Сыл саҕаланыаҕыттан исписэлиистэр 3,5 тыһыынчаттан тахса профилактическай рейдэни ыыттылар. Сылдьыы кэмигэр оһохтор, электрическэй ситимнэр туруктарын бэрэбиэркэлээтилэр, ону тэҥэ олохтоохторго баһаартан сэрэхтээх буолуу быраабылаларын санаттылар. Социальнай тэрилтэлэргэ баһаары умуруорар тэриллэри туруораллар уонна кэһиилэри туораталлар.
