Саха сиригэр Норуот сомоҕолоһуутун күнүн көрсө байыаннайдарга анаан бородуукта нобуордарын хомуйуу саҕаланна. Бу нобуордары өрөспүүбүлүкэттэн сылдьар байыаннайдарга инники кирбиигэ уонна госпиталларга тиэрдиэхтэрэ. Нобуордарга Саха сирин оҥорон таһаарааччыларыттан 12 көрүҥ бородуукта, ону тэҥэ харысхаллар уонна эҕэрдэлэр киирэллэр, диэн ЯСИА иһитиннэрэр.
«Бэлэх нобуордара олохтоох оҥорон таһаарааччылар бородуукталарыттан оҥоһуллар. Сүрүннээн өр хараллар эт бородууксуйата. Бородууксуйа уопсай кээмэйэ — 20 туоннаттан тахса. Бэлэх нобуордара анал байыаннай дьайыы зонатыгар, Хабаровскай уонна Приморскай кыраайдар, Амур уобалаһын, Москва уонна Санкт-Петербург госпиталларыгар тиэрдиллиэхтэрэ. Ону тэҥэ Улан-Удэҕэ ыытыллыахтара, онно биһиги байыастарбыт эмтэнэллэр уонна чөлгө түһэллэр», — диэтэ Донбаһы өйүүр уонна көмөлөһөр соҕуруулуу-илиҥҥи пуонда бэрэстэбиитэлэ Алексей Фёдоров.
Нобуорга киирэллэр: уомул балык миинэ, арыыга ыыһаммыт уомул, ыыһаммыт халбаһы, убаһа этэ, таба муоһуттан оҥоһуллубут энергетик, отон утаҕа, малина барыанньата, сугун уута, шеврон, харысхал, ыраастанарга аналлаах боҕуруоскай от уонна төлөпүөҥҥэ сыһыарыллар наклейка.
Саха сиригэр уоппускаҕа сылдьар байыаннайдар нобуору Аммосов уулуссатын 18 №-дээх дьиэтигэр кэлэн ылыахтарын сөп. Бэйэни туоһулуур докумуоннары уонна уоппуска билиэтин илдьэ кэлэллэрэ булгуччулаах.
Санатар буоллахха, анал байыаннай дьайыы саҕаланыаҕыттан «Кыайыыга бииргэ!» диэн өрөспүүбүлүкэтээҕи хамыыһыйа үлэлиир, салайааччыта — Саха сирин баһылыга Айсен Николаев. Өрөспүүбүлүкэҕэ Арассыыйа атын эрэгийиэннэрин кытта тэҥнээтэххэ, байыаннайдарга уонна кинилэр дьиэ кэргэттэригэр өйөбүл дьаһалларын биир саамай улахан кэмпилиэгэ олоххо киирэр.
