Арассыыйа олохтоохторо сэтинньи бастакы күннэригэр Ый уонна Юпитер, ону тэҥэ Ый уонна Венера ыкса чугаһыһыыларын көрүөхтэрэ. Ону чуолкайдык көрүөххэ сөп диэн ТАСС-ка Решетнев аатынан университет обсерваториятын дириэктэрэ Сергей Веселков иһитиннэрдэ.
«Ый Юпитеры кытта ыкса холбоһуутун Арассыыйа олохтоохторо көрүөхтэрэ. Сэтинньи 2 күнүгэр киэһэ уонна сэтинньи 3 күнэ буолар түүнүгэр халлааҥҥа Ый сиэрпэтэ уонна хараҥа халлааҥҥа саамай чаҕылхай планетата Юпитер чугасыһыахтара. Ый фазата 38% буолуоҕа. Холобур, Красноярскайга көрөөччүлэргэ эбийиэктэр ыккардыларыгар муннук арыттаһыылара муҥутуур кыра 0 кыраадыс уонна 39 муннук мүнүүтэҕэ диэри кыччыаҕа. Планета “отрицательнай” сулус кээмэйдээх (-2,0) буолуоҕа, ол паараны хараҕынан көрөн араарбакка билэргэ кыаҕы биэриэҕэ», — диэтэ Веселков.
Учуонай этэринэн, сэтинньи 7 күнүгэр Арассыыйа олохтоохторо Ый уонна Венера сарсыардааҥы холбоһууларын кэтээн көрүөхтэрэ. «Күн тахсыан иннинэ Кыыс сулустарын бөлөхтөрүгэр Ый сиэрпэтин (сырдыга 5%) Венера таһыгар кэтээн көрүөххэ сөп. Планета сырдыга -4,5 сулус кээмэйигэр тиийиэҕэ. Халлаан эттиктэрин ыккардыларыгар муннук арыттаһыылара 5 кыраадыс кэриҥэ буолуоҕа. Кэтээн көрүүгэ табыгастаах кэм — сарсыардааҥы дьыбар иннинээҕи чаастар», — диэн быһаарда Веселков.
