Саха сиригэр Федор Охлопков кэриэһигэр анаммыт үрдүк таһымнаах ытыыга IV норуоттар икки ардыларынааҕы турнир «Сулус» полигоҥҥа үөрүүлээхтик аһылынна. Бу туһунан Саха сирин баһылыга Айсен Николаев MAX ханаалыгар иһитиннэрдэ.
Быйыл күрэхтэһии аан бастаан норуоттар икки ардыларынааҕы статуһу ылла. Онно 187 ытааччы кыттар — анал байыаннай дьайыы кыттыылаахтара, күүс структураларын үлэһиттэрэ уонна баҕалаах дьон.
Николаев этэринэн, Арассыыйа вице-премьерэ — РФ Бэрэсидьиэнин Уһук Илин федеральнай уокуругар боломуочуйалаах бэрэстэбиитэлэ Юрий Трутнев өйөбүлүнэн турнир идэлээх дьон маастарыстыбаларын сайыннарар уонна уопут атастаһар былаһаакка быһыытынан сайдар.
Аан бастаан кыра калибрдаах бинтиэпкэнэн ытыыга эдэрдэр ортолоругар турнир ыытыллар — онно Уһук Илин 11 эрэгийиэниттэн 33 ытааччы кыттар. Эдэр дьон бэлэмнэрин бэрэбиэркэлиэхтэрэ уонна аҕа табаарыстарын уопуттарын иҥэриниэхтэрэ.
«Федор Матвеевич Охлопков өстөөҕү кытта эрэ охсуспатаҕа, эдэр снайпердары эмиэ үөрэппитэ. Биһиги улуу биир дойдулаахтарбыт үгэстэрин салҕыыр — кинилэр хорсун быһыыларын өйдүүрү, саҥа көлүөнэҕэ маастарыстыбаны тиэрдэри уонна биһиги уопсай Кыайыыбытыгар бэйэбит кылааппытын киллэрэри ааттыыбыт. Кыттааччыларга чуолкай табыылары уонна дьоһуннаах түмүктэри баҕарабын!» — диэтэ Николаев.
