Былатыан Ойуунускай төрөөбүтэ 133 сылыгар аналлаах тэрээһин төрөөбүт дойдутугар Тааттаҕа киэҥ хабааннаахтык ыытыллар. Үтүө күн кыттыылаахтара Наммара Төрдүгэр турар Былатыан Ойуунускай бастакы оскуолатыгар тохтоон ыллылар. Оскуола дириэктэрэ Егор Лебедев оҕолорго туһаайан бу үөрэх кыһата бүтүн Саха сиригэр үөрэх тарҕаныытыгар суолтатын кэпсээтэ. Бу кыра балаҕан-оскуола салгыы Чөркөөххө тутуллан, үгүс үөрэхтээх саха саарыннара олох суолугар хардыылыылларыгар сүҥкэн акылааты уурбута этилиннэ. Ол иһигэр Саха сирин Төрүт сокуонун оҥорбут иккисалайааччы бу оскуола кыһатын үөрэнээччилэрэ.
Былатыан Ойуунускай биир дойдулаахтара үтүө үгэс олохтоон, сэтинньи 11 күнүгэр Муҥха Дэлбэрийбит алааска мусталлар. Бүгүн эмиэ ити үгэс кэһиллибэккэ Чөркөөх уопсастыбаннаһа, салалтата, оскуола үөрэнээччилэрэ миитиҥҥэ кытыннылар.
Быйылгы тэрээһин биир историческай төрүтүнэн Чөркөөх оскуолата төрүттэммитэ 120 сылын туолар. Бу Наммара Төрдө алааһыгар 1906 сыллаахха Маппыайабыс учуутал үөрэх сырдык аартыгын аспыта. Оскуола бастакы үөрэнээччитинэн 14 саастаах Платон Слепцов буолбута. Дьылҕа хаан бэйэтинэн маанылаабыт курдук төрөөбүт балаҕаныттан чугас үөрэх кыһата арыллыбыта. «Мин манна иитиллэн атахпар турбутум… » диэн хойут Былатыан Ойуунускай төрөөбүт алааһын, силлиһэ турар бастакы оскуолатын хоһооҥҥо холбуоҕа…
Миитиҥҥэ Октябрьскай нэһилиэк баһылыга Олег Ущницкай, Былатыан Ойуунускай аатынан СӨ судаарыстыбатын музейын сэбиэдиссэйэ Михаил Аржаков, оскуола директора Егор .Лебедев, оскуола 10-с кылааһын үөрэнээччитэ Анжелика Николаева тыл эттилэр. Миитиҥ нэһилиэк Өрөгөйүн ырыатынан түмүктэннэ, сибэкки дьөрбөлөрө Улуу биир дойдулаахпыт Мэҥэ өйдөбүнньүгэр уурулуннулар.
Былатыан Ойуунускай төрөөбүт, күнү көрбүт балаҕаныгар музей үлэһиттэрэ сылаас аал уоту тигинэччи оттон, итии чэйдээх, алаадьылаах, саха мааны аһынан саламаатынан күндүлээтилэр.
Бүгүн сарсыардаттан сыа хаар сымнаҕастык түһэн, былыттаах күн сатыылаан сылаас күн турда. Бу күн 133 сыл анараа өттүгэр норуот уола Былатыан Ойуунускай күн сирин көрбүтэ. Баҕар оччолорго эмиэ хаар түһэн, саҥа олоҕу тутар киһини айхаллыы көрсүбүтэ буолуо.
Ааптар: Светлана Халгаева
