Тыа хаһаайыстыбатын сайыннарыы уонна тыа хаһаайыстыбатын бородууксуйатын, сырьетын уонна аһын-үөлүн ырыынагын тэрийии судаарыстыбаннай бырагырааматын чэрчитинэн агробизнес кыра салааларын инники күөҥҥэ турар хайысхаларын өйүүр кыахтара кэҥэтиллиэҕэ. Бу туһунан дьаһалга бырабыыталыстыба бэрэссэдээтэлэ Михаил Мишустин илии баттаата.
Бырабыыталыстыба бырагырааматыгар урбаанньыттар пиэрмэр хаһаайыстыбаларын эбэтэр тыа хаһаайыстыбатын потребительскай кэпэрэтииптэрин сайыннарыы бырайыактарын олоххо киллэриигэ, кыра тыа пекарнятын тэрийиигэ, ону тэҥэ анал байыаннай дьайыы кыттыылаахтарын агро-бырайыактарын олоххо киллэриигэ ылбыт кирэдьииттэрин сорҕотун сабарга грант өйөбүлүн үбүн-харчытын туһаныы кыаҕын туһунан балаһыанньа киллэрилиннэ. Маннык толуйуу кээмэйэ ылыллыбыт кирэдьиит сууматын 20 бырыһыаныгар тиийиэн сөп.
Маны таһынан, 3 мөлүйүөн солкуобайга диэри сыаналаах оборудованиены атыылаһарга субсидияны ыларга агробизнес кыра салааларын бэрэстэбиитэллэригэр маннык тиэхиньикэни Арассыыйа бырамыысыланнай бородууксуйатын эбэтэр Арассыыйаҕа ханыыта суох бырамыысыланнай бородууксуйа реестригэр киллэрии туһунан бигэргэтии наадата суох буолуоҕа. Бу агробизнес кыра салааларын бэрэстэбиитэллэригэр, ол иһигэр тыа туризмын сайыннарааччыларга, административнай ноҕуруусканы намтатыаҕа уонна улахан ассортименнаах оборудованиены атыылаһарга ордук тоҕоостоох буолуоҕа.
2027 сылга быйыл саҕаламмыт үүт пиэрмэлэрин акселератын бырайыактарыгар грант биэрии салҕаныаҕа, бу урбаанньыттарга үп-харчы кутталын намтатарга уонна агробырамыысыланнас салаатын модернизациялааһын тэтимин тутарга кыаҕы биэриэҕэ.
Михаил Мишустин судаарыстыба өйөбүлүн механизмнарын тупсарыы агробырамыысыланнас комплексыгар кыра тэрилтэлэргэ көмөлөһүөхтээҕин бэлиэтээтэ. «Кинилэр аһынан-үөлүнэн хааччыйыыга дьоһун кылааты киллэрэллэр уонна тыа сиригэр үлэ миэстэтин таһаараллар», — диэн бырабыыталыстыба баһылыга бэлиэтээтэ.
