Ону кытта тэҥҥэ вантовай муоста киин пилонун аннынааҕы коффердамы сылытыы бара турар. МИК-С металлоконструкциялар көмөлөрүнэн манна 18 миэтэрэттэн тахса үрдүктээх көмүскүүр зона тэриллэр. Бу үлэ барар сирин тымныыттан уонна тыалтан көмүскүүргэ уонна олус тымныы кэмҥэ коффердам иһигэр буронабивной сыбаайалары оҥорууну салгыырга кыах биэриэҕэ.
Өрүскэ уонна биэрэгэр муоста, ону кытта эстакада тирэхтэрин туруоруу салҕанар. Уҥа биэрэктэн, «Лена» федеральнай массыына суолун өттүттэн, саамай кытыы тирэх сыбаайатын фундаменын тутуута түмүктэннэ. Манна 21 буронабивной сыбаайа түһэрилиннэ уонна үөһээ өттө быһылынна, исписэлиистэр тирэх ростверкатын армированиелааһыҥҥа киирдилэр. Бырайыак иһинэн бүгүҥҥү күҥҥэ барыта 920 сыбаайаттан 377-тэ оҥоһулунна. Хаҥас биэрэгэр эмиэ үһүс коффердам хомулла турар, эркин 38 блогуттан 35-һэ холбонон улаатыннарылынна.
Өлүөнэ муостатын тутуута Арассыыйаҕа муоста тутуутун устуоруйатыгар туспа киириэҕэ, тоҕо диэтэххэ элбэх технология, ол иһигэр устар коффердамнар, аан бастаан Арктика килиимэтин усулуобуйатыгар туттуллаллар.
Бу улахан далааһыннаах эбийиэк «ВИС» бөлөх уонна Саха сирин Бырабыыталыстыбатын концессионнай сөбүлэһиилэринэн, бүддьүөккэ киирбэт үбү-харчыны тардан тутуллар, кинилэр тутуу кэмигэр ылар өлүүлэрэ 47% буолар. Бырайыак Бэрэсидьиэн Владимир Путин көҕүлээбит «Олоххо туһуламмыт инфраструктура» национальнай бырайыагар киирбитэ. Холдинг манна инвестор, концессионер уонна генеральнай бэдэрээччит быһыытынан кыттар. Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспата.
