Дойду үрдүнэн оскуолаларга 2027 сыл тохсунньутуттан «Арассыыйа духуобунай култуурата» диэн саҥа биридимиэти үөрэтэн саҕалыахтара. Маны бастакынан бэһис кылаас үөрэнээччилэрэ үөрэтиэхтэрэ, кинилэргэ аналлаах учуобунньуктар сыл бүтүөр диэри үөрэх тэрилтэлэригэр тиийиэхтэрэ. Бу туһунан РФ Үөрэҕирии министиэристибэтин баһылыга Сергей Кравцов иһитиннэрдэ, суруйда Саха сирэ саайт.
«2027 сыл тохсунньутуттан оскуола оҕолоро саҥа биридимиэти үөрэтэн саҕалыахтара, оттон быйыл сыл бүтүөр диэри 5-с кылааска аналлаах учуобунньуктар оскуолаларга тиксэриллиэхтэрэ», — диэн Кравцов эппитин Үөрэҕирии министиэристибэтин пресс-сулууспата иһитиннэрэр. Онон, наадалаах үөрэх босуобуйалара уруоктар саҕаланыахтарыгар диэри тиэрдиллиэхтээхтэр.
Урут Үөрэҕирии министиэристибэтэ «Арассыыйа духуобунай култуурата» биридимиэт учуобунньуктарын федеральнай испииһэккэ киллэрбитэ. Онно бэһис эрэ буолбакка, алтыс уонна сэттис кылаастарга аналлаах босуобуйалар эмиэ киирбиттэрэ. Ол эрээри Кравцов кинигэлэри тиэрдии болдьоҕун билигин бэһис кылаастарга эрэ чуолкайдаата.
Инникитин саҥа биридимиэт алтыс уонна сэттис кылаастарга эмиэ баар буолуоҕа — эһиилги үөрэх дьылыттан. Уруоктарга оскуола оҕолорун, үтүө холобур буолар биир дойдулаахтарбыт олохторун кэпсээннэрин нөҥүө, төрүт сыаннастарга билиһиннэрэр былааннаахтар.
