Саха сирин баһылыга Айсен Николаев Ростехнадзор Ленскэй управлениетын салайааччытын эбээһинэһин толорооччу Виталий Савченконы кытта оробуочай көрсүһүүнү ыытта, диэн иһитиннэрэр sakha.gov.ru.
Дьүүллэһии сүрүн тиэмэтинэн өрөспүүбүлүкэ 2026/2027 сыллардааҕы кыстыгы ааһарыгар бэлэмнэниитэ, итиини хааччыйар эбийиэктэр эрэллээх үлэлэрин хааччыйыы уонна муниципальнай тэриллиилэр бэлэм пааспардарын ылыылара буолла.
Көрсүһүү кэмигэр муниципальнай тэриллиилэр бэрэбиэркэлээһиннэрин быыһык түмүктэрин, хомунаалынай инфраструктура эбийиэктэрин туругун, хочуолунайдар уматыгынан хааччыллыыларын, ону тэҥэ сыыһаны бэлиэтээһиннэри туоратыы боппуруостарын көрдүлэр. Ситэриилээх былаас органнарын, муниципалитеттар уонна кэтээн көрөр тэрилтэлэр бииргэ үлэлээһиннэригэр ураты болҕомто уурулунна.
«Биһиги уһун кыһын усулуобуйатыгар итиини хааччыйар систиэмэлэр туруктаах үлэлэрин тэрийии – биир тутаах сорукпут. Бэлиэтэммит сыыһалары барытын кэмигэр туоратыахха, оборудование бэлэм буолуутун уонна уматык наадалаах саппааһын хааччыйыахха наада. Муниципальнай тэриллиилэр баһылыктара уонна ресурсаны хааччыйар тэрилтэлэр салайааччылара бу боппуруостарга бары эппиэтинэстээхтик сыһыаннаһыахтаахтар. Биһиги сүрүн сорукпут — ититэр сезон устата өрөспүүбүлүкэ олохтоохторун эрэллээх, тохтоло суох итиинэн хааччыйыыны тэрийии», — диэн Айсен Николаев бэлиэтээтэ.
Эбии болҕомтону эрэйэр сүрүн боппуруостарынан итиини хааччыйыы схемаларын саҥардыы, саахалланар быһыыны-майгыны туоратыыга дьайыы былааннарын оҥоруу, итиини хааччыйар тэрилтэлэр бэлэмнэрин туһунан докумуоннары оҥоруу, ону тэҥэ сүрүн уонна саппаас хочуолунай уматыгын наадалаах саппааһа баарын бигэргэтии буолаллар.
Нерюнгри оройуонугар быһыы-майгы, ол иһигэр балаҕан ыйын 22 күнүгэр буолбут быһылаан кэнниттэн Нерюнгритааҕы ГРЭС-кэ чөлүгэр түһэрии үлэтин хаамыыта туспа көрүлүннэ. Билигин туһанааччылары итиинэн уонна уотунан хааччыйыы штатнай эрэсииминэн ыытыллар. Ыстаансыйаҕа өрөмүөннүүр уонна чөлүгэр түһэрэр дьаһаллар салҕаналлар. Ростехнадзор ыыппыт бэрэбиэркэтин түмүгүнэн арыллыбыт кэһиилэри туоратыы туһунан ыйыы-кэрдии бэрилиннэ.
Маны сэргэ Алдан оройуонун итиини хааччыйар эбийиэктэригэр уматык нормативнай саппааһын хааччыйыы боппуруостара дьүүллэһилиннилэр. Чуолаан, 26 теплогенерация эбийиэгин туһанар «Теплоэнергосервис» тэрилтэҕэ быһыы-майгы көрүлүннэ. Тутаах боппуруостар истэригэр уматыгы кэмигэр тиэрдии уонна кыһыҥҥы кэмҥэ хочуолунайдар туруктаах үлэлэрин хааччыйыы.
Муниципальнай тэриллиилэри уонна Ростехнадзор Ленскэй управлениетын кытта олох-дьаһах хааччыйар эбийиэктэрин уотунан хааччыйыы саппаас источниктарын эбии бэрэбиэркэлээһин тэрилиннэ.
Оробуочай көрсүһүү кэмигэр көрүллүбүт бэрэбиэркэлиир дьаһаллары барытын түмүктээһин, арыллыбыт кэһиилэри туоратыы уонна хомунаалынай инфраструктура намыһах температура усулуобуйатыгар үлэҕэ бэлэмнээҕин хааччыйыы наадатыгар ураты болҕомтону уурдулар. Бу хайысхаларынан үлэ Саха сирин бырабыыталыстыбатын, Олохтоох салайыныы органнарын уонна Ростехнадзор Ленскэй управлениетын бииргэ үлэлээһиннэригэр салҕанар.
