Татарстан успуорка министиэристибэтигэр сэтинньи 26 күнүттэн 30 күнүгэр диэри 2026 сыллаахха Казань куоракка ыытыллар мас-рестлиҥҥэ аан дойду чөмпүйэнээтигэр бэлэмнэниигэ анаммыт тэрийэр кэмитиэт мунньаҕа буолла. Бу туһунан Арассыыйатааҕы мас-рестлинг федерацията иһитиннэрдэ, ЯСИА суруйда.
Мунньахха сотору кэминэн ыытыллар норуоттар икки ардыларынааҕы күрэхтэһиилэри бэлэмнээһин уонна ыытыы сүрүн боппуруостара дьүүллэһилиннилэр. Сэбиэккэ Татарстан успуорка миниистирин бастакы солбуйааччы Халил Шайхутдинов, Арассыыйатааҕы мас-рестлинг федерациятын бастакы вице-бэрэсидьиэнэ, Василий Манчаары аатынан национальнай успуорт көрүҥнэрин киинин дириэктэрэ Геннадий Васильев, Арассыыйатааҕы мас-рестлинг федерациятын толорооччу дириэктэрэ Иван Сивцев, ону тэҥэ успуорт уопсастыбатын бэрэстэбиитэллэрэ кытыннылар.
Бэлиэтээн эттэххэ, Арассыыйа сүүмэрдэммит хамаандатын састааба сүрүн тириэньэр Айсен Атастыров салалтатынан дойду чөмпүйэнээтин уонна үөрэтэр-эрчийэр хомуурдар түмүктэринэн оҥоһуллуоҕа.
Аан дойду мас тардыһыытын күүстээх маастардара кытталлара күүтүллэр. Дьиэлээхтэргэ Кыргызстан, Монголия, Словакия, Иран, Казахстан, Ангола, Венгрия, Египет, Пакистан уонна да атын дойдулар хамаандалара ураты киирсиини көрдөрүөхтэрэ.
