Саха сирин баһылыга Айсен Николаев парламент уочараттаах пленарнай мунньаҕын иннинэ өрөспүүбүлүкэ Судаарыстыбаннай Мунньаҕын (Ил Түмэн) салалтатын кытта үлэ көрсүһүүтүн ыытта диэн sakha.gov.ru иһитиннэрэр.
Кэпсэтии кэмигэр баһылык бүддьүөт уонна нолуок боппуруостарыгар улахан болҕомтону уурда. Айсен Николаев бүгүн дойду анал байыаннай дьайыыны ыытыы уустук усулуобуйатыгар олорорун бэлиэтээтэ. Кини федеральнай бүддьүөт ылылларыгар былырыыҥҥы таһым оннунан хаалыа диэн эрэнэрин биллэрдэ.
«Биһиэхэ 2027 сылга өрөспүүбүлүкэ бүддьүөтүн бастакы ааҕыыга ылыахпытын наада, ол хас да боппуруоһу быһаарар кыахтаах. Бастакыта — хамнас, иккиһэ — хомунаалынай ороскуоттар уонна үсүһэ — хомунаалынай хаһаайыстыба субсидията», — диэн Айсен Николаев тоһоҕолоон бэлиэтээтэ.
Өрөспүүбүлүкэ баһылыга үп министиэристибэтигэр Ил Түмэҥҥэ иккис уонна үһүс ааҕыыларга парламент кэмитиэттэрин кытта дьоһуннаахтык үлэлииргэ сорудахтаата, 2027 сылга өрөспүүбүлүкэ бүддьүөтүн муҥутуур тэҥнээх оҥорор туһугар.
Ил Дархан норуот дьокутааттарын кытта эһиилги бүддьүөккэ эбии үбү киллэриигэ нолуоктарга сыһыаннаах хас да быһаарыылары дьүүллэстэ.
Судаарыстыбаннай Мунньах (Ил Түмэн) бэрэссэдээтэлэ Алексей Еремеев уонна парламент бигэ кэмитиэттэрин салайааччылара көрсүһүүгэ өрөспүүбүлүкэ социальнай-экэнэмиичэскэй сайдыытын суолталаах боппуруостарыгар этиилэри уонна ыйытыылары киллэрдилэр. Бүддьүөт үлэһиттэрин хамнаһын, Аартыка улуустарын аһынан-үөлүнэн куттала суох хааччыйыыга, Арктическай эргиэн-логистика хампаанньатын үбүлээһин мэхэньииһимин, элбэх оҕолоох дьиэ кэргэттэри өйөөһүнү, өрөспүүбүлүкэ инвестицияҕа бырагырааматын олоххо киллэриини, социальнай эбийиэктэри тутууну, нэһилиэнньэлээх пууннары гаастааһыны таарыйар боппуруостар киэҥник көрүлүннүлэр.
Саха сирин баһылыга Айсен Николаев киирбит боппуруостар бырабыыталыстыба быһаарыыларыгар учуоттаныахтара диэн бэлиэтээтэ.
