С.Ф. Гоголев аатынан Дьокуускайдааҕы педагогическай коллеһы хапытаалынай өрөмүөн кэннэ арыйдылар. 4 тыһыынча кэриҥэ иэннээх биэс мэндиэмэннээх дьиэ араас улуустан үөрэнэ кэлбит 350 устудьуон олороругар анаммыт. АБ Бэрэсидьиэнэ Владимир Путин көҕүлээһининэн тэриллибит “Профессионалитет” бэдэрээлинэй бырайыак “Ыччат уонна оҕолор” национальнай бырайыагын чэрчитинэн хапытаалынай өрөмүөн ыытылынна.
Дьиэҕэ уопсай тутуу үлэтэ ыытылынна, ититии, салгын, уунан хааччыйыы уонна ууну таһаарыы, уот ситимнэрэ саҥардылыннылар, баһаарынай сигнализация туруорулунна. Үһүс, төрдүс уонна бэһис мэндиэмэннэргэ суунар хосторо оҥоһулуннулар. Бастакы этээскэ таҥас сууйар массыына уонна иһэр уу аппараата турдулар.
Арыллыы үөрүүтүн үллэстэ кэллилэр: Ил Түмэн хотугу төрүт олохтоох аҕыйах ахсааннаах норуоттар уонна Аартыка дьыалаларыгар сис кэмитиэтин бэрэссэдээтэлэ Елена Голомарева, Саха сирин үөрэҕин уонна билимин миниистирэ Нюргуна Соколова, үөрэх уонна билим миниистирин бастакы солбуйааччыта Виктория Захарова, идэтийбит үөрэх сайдыытын үнүстүүтүн дириэктэрэ Лилия Иванова, Дьокуускай куорат үөрэҕи салайыы начаалынньыга Андрей Новоприезжай, кэллиэс бэтэрээннэрэ уонна социальнай партнердар.
Пилотнай бырайыак чэрчитинэн хапытаалынай өрөмүөнээһин сайаапката икки сыл анараа өттүгэр ыытыллыбытын туһунан миниистир Нюргуна Соколова иһитиннэрдэ. Эбийиэги бырагыраамаҕа киллэрэргэ кэллиэскэ өрөмүөн наадатын туһунан отчуотугар көрдөрдө, сметанан көрүллэр докумуоннары оҥордо уонна судаарыстыбыннай экспэртиисэ сөбүлэҥин ылла. “Кэлэктиип соруктары барытын ситистэ, судаарыстыбыннай эксэртиисэ сөбүлэҥин ылла. Онон эбийиэк бэдэрээлинэй бүддьүөт үбүнэн ыытыллар хапытаалынай өрөмүөн оҥоһуллар уопсайдар ахсааннарыгар киирдэ. “Профессионалитет” бэдэрээлинэй бырыайыакка кыттыыта услуобуйа биирдэстэрэ буолар. Кэллиэс онно номнуо иккис сылын үлэлиир”, — диэн Нюргуна Соколова кэпсээтэ.
Маны таһынан урут саҥардыы чэрчитинэн Дьокуускайдааҕы педагогическай кэллиэскэ саҥа үөрэх кэбиниэттэрэ оҥоһуллубуттарын уонна үөрэх куорпуһугар хапытаалынай өрөмүөн ыытыллыбытын миниистир санатта.
Кэллиэс дириэктэрэ Изольда Николаева этэринэн, уопсай дьиэтэ 1974 сыллаахха тутуллубут. “Бүгүн 4 тыһыынча кэриҥэ иэннээх биэс мэндиэмэннээх дьиэ араас улуустан үөрэнэ кэлбит 350 устудьуон олорор дьиэтэ буолла”, — диэн кини иһитиннэрдэ.
Тылбаас: Саргылана Слепцова
