Алтынньы 23 күнүттэн саҕалаан, Дьокуускай — Аллараа Бэстээх хайысханан паром сырыытыгар тарыып үрдүөҕэ. Тиэхиньикэни таһыы сыанатын туһунан «Саха сирин паромнара» УК салайааччыта Николай Ефимов ЯСИА-ҕа кэпсээтэ.
«Барыллаан, таһаҕас массыынатын тиэйии сыаната биир хайысхаҕа 100 тыһыынча солкуобайга диэри үрдүөҕэ. Чэпчэки массыынаны тиэйии сыаната маарркатыттан көрөн 5-тэн 15 тыһыынча солкуобайга диэри буолуоҕа. Ол гынан баран, пассажирдары таһыы тарыыба уларыйбат — улахан киһиэхэ 350 солкуобай», — диэн ЯСИА-ҕа Николай Ефимов быһаарда.
Алтынньы 22 күнүгэр диэри паромнар сайыҥҥы тарыыптарынан сылдьаллар.
«Бээтинсэттэн, алтынньы 23 күнүттэн, өрүс туругун кэтээн көрүөхпүт. Муус турдаҕына, паром ахсаана аҕыйыаҕа, буксир тиэхиньикэтин тардыахпыт. Барыта күн-дьыл туругуттан тутулуктаах, билигин өрүскэ турук үчүгэй», — диэн эбэн эттэ Николай Ефимов.
Санатан эттэххэ, пассажирдары таһарга Дьокуускай — Аллараа Бэстээх маршрутунан салгын сыттыктаах суудуналар үлэлииллэр. Быйыл тарыып урукку таһымыгар турар — пассажирга 2500 солкуобай.
