Үөһээ Бүлүүтээҕи ас-үөл кэмбинээтэ быйыл үүккэ былаанын 2100 туоннаттан 98 %-нын 9 ыйынан толордо. Ол туһунан кэмбинээт салайааччыта Николай Алексеев иһитиннэрдэ.
Оҥорон таһаарыы уопсай көрдөрүүтэ, 9 ый түмүгүнэн маннык: 14 туонна 42 %-наах сүөгэй, 1 т. 800 кг 50 %-наах сүөгэй, 8 туонна 2,5 %-наах үүт, 64 туонна арыы, 1 200 киилэ иэдьэгэй, 49 туонна кэпиир уонна суорат, 16 туонна быырпах, 4,5 туонна 6 араас көрүҥнээх йогурт, 7 туонна сироп, 3 туонна барыанньа, 0,220 туонна кыынньыбыт арыы. 92 мөлүйүөн солкуобайтан тахса суумалаах бородууксуйа атыыламмыт.
Бүгүҥҥү күҥҥэ ыскылаакка 22 туонна арыы, 0,689 туонна сироп, 0,03136 туонна барыанньа, 0,07905 туонна кыынньыбыт арыы уонна 0,384 туонна иэдьэгэй хараллан турар.
Сотору кэминэн 900 солк. сыаналаах ынах арыыта атыыга тахсыаҕа, диэн Николай Алексеев кэпсээтэ.
Тэрилтэ отону киилэтин 400 солк тута олороллор. Сотору кэминэн тоҥ үүтү тутар былааннаахтар. Салгыы эт бородууксуйатын оҥорон таһаарар үлэ наадатын улуус дьаһалтатын мунньаҕар бэлиэтээтилэр. «Биир сонун бородууксуйа атыыга тахсарын наадатыгар декларация, анаалыс оҥотторор ороскуота 150 тыһ. солк. кэриҥэ буолар. Атыыга тахсар бородууксуйа ороскуотун сабыныахтаах, онтон барыска тахсыахтаах. Билиҥҥи туругунан эт аһы, халбаһы оҥорор оборудование тэрилтэҕэ суох», — диэн салайааччы быһаарда.
Быйылгы сезоҥҥа 42 киһи үлэлээтэ, ол иһигэр быстах үлэ дуогабарынан үлэлээччилэр бааллар, диэн суруйда @uoheebuluu
