Өлүөнэ муостатын тутуу эбийиэгэр 920 сыбаайаттан 365-һэ турда — уопсай кээмэй 40%-на. 26 тирэхтэн 12-гэр (46%) сыбаайа олохторо бэлэмнэр. Уҥа кытылга буор бүрүөһүнү кутуу салҕанар: 2,8 мөл. кубометр буортан 730 тыһыынчаттан тахсата уурулунна. Былаһааккаҕа суукканы эргиччи 300-тэн тахса исписэлиис уонна 70-ча тиэхиньикэ үлэлиир.
«Биһиги 2019 сыллаахха кэлэ сылдьыбыппыт. Өрөспүүбүлүкэ олохтоохторо бу бырайыак олоххо киирэрин төһө күүппүттэрин билэбит. Муоста Саха сиригэр улахан туһаны аҕалыаҕа диэн эрэнэбин», — диэн Сэбиэт кэмитиэтин бэрэссэдээтэлэ Андрей Кутепов эттэ. Сенатор бырайыак тутуута болдьоҕор бүтэригэр эрэлин биллэрдэ.
Муоста Арассыыйа бэрэсидьиэнэ Владимир Путин көҕүлээһининэн «Инфраструктура для жизни» нацбырайыагынан тутуллар. Тимир баайыылаах муоста уһуна 4,6 км, киирии суолларын кытта — 14,5 км. Тутуллан киирбитин кэннэ сылга 8 мөл. киһи айанныаҕа.
