Саха сиригэр «Цифровой ID» өҥөнү киллэрии салҕанар. Бу өҥөнү туһанан биэнсийэлээхтэр, инбэлииттэр уонна элбэх оҕолоох дьиэ кэргэттэр MAX сыһыарыы нөҥүө чэпчэтиигэ бырааптарын биир баттааһынынан бигэргэтиэхтэрин сөп. Билигин бу өҥөҕө 40 бибилэтиэкэ, 236 култуура уонна сынньалаҥ тэрилтэтэ, 50 түмэл уонна өрөспүүбүлүкэ судаарыстыбаннай тыйаатыр-саататар тэрилтэлэрэ холбоммуттар. Бу бырайыак Арассыыйа Бэрэсидьиэнэ Владимир Путин көҕүлээбит «Экономика данных и цифровая трансформация государства» национальнай бырайыак чэрчитинэн олоххо киирэр.
Култуура тэрилтэлэригэр тиийэн, босхо эбэтэр чэпчэтиилээх өҥөнү туһаныыны таһынан, бу өҥө эргиэн ситимнэригэр чэпчэтиилэри туһанарга уонна чэпчэтиилээх айанынан туһанар быраап биэрэр.
«Урут чэпчэтиибин бигэргэтээри кумааҕылары илдьэ сылдьарым, билигин MAX-ка QR-код баар. Киирэргэ сканердыыллар — бүттэҕэ ол, уонна саамай сүрүнэ, «баар» эбэтэр «суох» эрэ диэн көстөр, ханнык да тус дааннайдар көстүбэттэр. Оҕолордоох буолан тыйаатырга уонна түмэллэргэ сылдьарбыт быдан табыгастаах буолла. Бу дьиҥнээх дьоҥҥо кыһамньы», — диэн Саха сирин култуура тэрилтэлэрин көтүппэт көрөөччү, элбэх оҕолоох ийэ Анна Петрова кэпсээтэ.
Кумааҕы докумуоннар уруккутун курдук үлэлииллэр. «Цифровой ID» — докумуон сыыппара көрүҥэ. Өҥө национальнай MAX мессенджер уонна «Госуслуги» портал инфраструктураларын нөҥүө үлэлиир.
