Алтынньы 31 күнүгэр Саха сиригэр «Арассыыйа омуктара» диэн норуоттар икки ардыларынааҕы нэдиэлэ уонна «Үгэстэр өрүттэрэ — Саха сирин култуурунай кода» диэн бырагыраама чэрчитинэн, сыллата ыытыллар «Норуоттар ийэ туһунан ыллыыллар» диэн норуоттар икки ардыларынааҕы бэстибээл буолуоҕа. Тэрээһин өрөспүүбүлүкэтээҕи Ийэ күнүгэр уонна Арассыыйа норуоттарын сомоҕолоһуутун сылыгар ананар.
Бэстибээли А. Е. Кулаковскай аатынан Норуоттар доҕордоһууларын дьиэтэ уонна Саха Өрөспүүбүлүкэтин Арассыыйа норуоттарын ассамблеята тэрийэн ыыталлар. Быйыл бырааһынньык 14-с төгүлүн ыытыллар уонна үгэс быһыытынан, араас омук бэрэстэбиитэллэрин ийэҕэ махталларын уонна тапталларын биллэрээри түмүөҕэ.
Тэрийээччилэр бэлиэтииллэринэн, бэстибээл элбэх омуктаах өрөспүүбүлүкэ биир суолталаах үтүө үгэһигэр кубулуйда: «Сыллата ийэ туһунан ыллыыр кыттааччы ахсаана элбиир. Бэстибээл хас да суолталаах соругу быһаарар: дьахтар-ийэҕэ уонна Арассыыйа араас норуоттарын култуураларыгар уонна үгэстэригэр ытыктабылы иитэр, ийэҕэ тапталы уонна ытыктабылы бөҕөргөтөр, ийэ буолуу оруолун үрдэтэргэ көмөлөһөр».
Кэнсиэр бырагырааматыгар оҕолортон улахан дьоҥҥо тиийэ саастаах ырыа ансаамбыллара уонна биирдиилээн толорооччулар кыттыахтара. Көрөөччүлэр ийэ туһунан сахалыы, нууччалыы, эбээннии, дьүкээгирдии, эрмээннии, кыргыыс уонна да атын тылларынан ылланар ырыалары истиэхтэрэ. Кыттыылаахтарынан национальнай-култуурунай холбоһуктар бэрэстэбиитэллэрэ уонна тас дойду устудьуоннара буолуохтара, бу тэрээһин сомоҕолуур күүһүн уонна эрэгийиэн култуурунай элбэх өрүттээҕин бэлиэтиир.
Бэстибээли кытта биир күн «Норуот үгэстэрин харыстааһын Ийэлэр илиилэригэр» диэн национальнай-култуурунай холбоһуктар дьахталларын өрөспүүбүлүкэтээҕи форума ыытыллыаҕа. Форум култуура нэһилиэстибэтин тиэрдиигэ дьахтар оруолун, омуктар икки ардыларыгар или-эйэни бөҕөргөтүүнү уонна Саха сиригэр олорор норуоттар ураты үгэстэрин харыстааһыны дьүүллэһэр былаһаакканан буолуоҕа.
«Норуоттар ийэ туһунан ыллыыллар» бэстибээл — өрөспүүбүлүкэҕэ норуоттар икки ардыларынааҕы сыһыаннаһыы уонна дьиэ кэргэн сыаннастарын өйөөһүн эйгэтигэр судаарыстыбаннай бэлиитикэни олоххо киллэрии чаҕылхай холобура. Тэрэээһин Саха сирин элбэх омуктаах норуотун сомоҕолоһуутун бөҕөргөтөргө, этнокултуура элбэх өрүтүн харыстыырга уонна уопсастыба биир суолталаах төрүтүн быһыытынан ийэ буолууга ытыктабыллаах сыһыаны олохтуурга көмөлөһөр.
