Нам улууһун Партизан нэһилиэгиттэн «Хомус» фольклор киинин иһинэн үлэлиир «Күбэйэ» уонна чабырҕахсыттар «Сайбай» диэн ансаамбыллара «Времена года. Петербург» бэстибээлгэ ситиһиилээхтик кытыннылар. Ол курдук дойду сүүрбэттэн тахса регионуттан уонна киин куораттартан айар бөлөхтөр мустан, биир тылынан эттэххэ, Москваттан Саха сиригэр тиийэ киэҥ хабааннаах култуура тэрээһинэ буолан ааста.
Биир дойдулаахтарбыт бу сырыыларын туһунан дэлэгээссийэ салайааччыта, Д.И. Кривошапкин аатынан «Хомус» фольклор киинин дириэктэрэ, СӨ Култууратын туйгуна, Нам улууһун Култууратын Бочуоттаах үлэһитэ, Россиятааҕы култуура идэлээх үлэһиттэрин Сойууһун бочуоттаах үлэһитэ, Үлэ бэтэрээнэ Семен Германович Алексеев бу курдук кэпсээтэ:
— Олус үчүгэй тэрээһиннээх бэстибээл буолан ааста. Ол курдук биэс киһилээх «Сайбай» чабырҕахсыттар ансаамбылбыт бастакы истиэпэннээх лауреат буолла. Оттон үһүс көлүөнэ саастаахтарга «Күбэйэ» үҥкүүһүттэр бөлөхтөрө иккис истиэпэннээх лауреат буолары ситистэ. Манна уон далбар хотун кэлэн кытынна, саамай аҕа кыттааччыбыт — 75 саастаах.
Үлэм чэрчитинэн кыраныысса да таһыгар элбэх бэстибээллэргэ, куонкурустарга кыттыбытым, оҕолору да илдьэ сылдьыбытым. Ону барытын тэҥнээн көрдөхпүнэ, дойду иһинээҕи тэрээһиннэргэ кыттыы быдан ыарахан эбит. Кытаанахтык дьүүллүүллэр. Норуот артыыстара, үтүөлээх педагогтар, режиссердар сыаналыыллар. Ол иһин Россия иһинээҕи тэрээһиннэр быдан таһымнаах эбиттэр диэн түмүккэ кэллим.
Биһиги кыттыыбытын олус сэҥээрдилэр. Дьүүллүүр сүбэҕэ олорооччулар фольклор өттүгэр чабырҕах курдук уус-уран тылынан жанр баарын саҥа истибиттэрин билиннилэр. Институттарга, үлэбитигэр даҕаны туһаныахпыт, көрдөрүөхпүт диэн анаан-минээн видеоҕа уһуллулар.
Ол курдук «Сайбай» чабырҕахсыттар ансаамбылбыт тэриллибитэ быйыл 10 сылыгар бу курдук үрдүктүк сыаналанан, бэлэх кэриэтэ сананан төннөн эрэбит.
Биһиги аҥардас култуурунай тэрээһининэн муҥурдаммакка, анал байыаннай дьайыыга кытта сылдьан эчэйиини ылан, маннааҕы госпиталларга эмтэнэ сытар сахабыт уолаттарыгар дойдубутуттан ас-үөл илдьэ кэлбиппит. Ол курдук нэһилиэкпитигэр ыҥырыы таһаарааппытын кытта биир күн иһигэр дьоммут-сэргэбит күһүҥҥү быйаҥнарыттан бэрсэн, хомуйа охсон ыраах айаҥҥа туруммуппут. Түмүгэр манна РФ Президенин иһинэн СӨ Бэрэстэбиитэлистибэтин Петербургдааҕы салаатыгар кэлэн, салайааччылары уонна волонтердары кытта көрсөн, бэйэбит көмөбүтүн туттаран, ирэ-хоро кэпсэтэн тарҕастыбыт.
Онон сырыыбытынан толору астынан, Петербург курдук улуу уонна кэрэ куораты уһаты-туора хааман, дьону-сэргэни кытта билсэн, сахабыт култууратын көрдөрөн, өссө да кэлиэхпит диэн баҕа санаалаах дойдубутугар төннөн эрэбит.
Кэпсэттэ: РФ суруналыыстарын Сойууһун чилиэнэ Анфиса Слепцова, Санкт-Петербург к.
