2026 сыл сэтинньи 2 күнүттэн 7 күнүгэр диэри Саха сиригэр IV «Норуот уонна армия биир» диэн өрөспүүбүлүкэтээҕи антифашистскай форум ыытыллыаҕа. Бу туһунан sakha.gov.ru сайт иһитиннэрэр.
«Пуорум сүрүн сыаллара — уопсастыбаны сомоҕолооһун, эдэр ыччаты патриотическай иитии, анал байыаннай дьайыы кыттыылаахтарын уонна кинилэр дьиэ кэргэттэрин өйөөһүн, ону тэҥэ фашизмы утары охсуһуу. Сүрүн тэрээһиннэр Дьокуускайга Илиҥҥи уонна Соҕуруу байыаннай уокуруктар бэрэстэбиитэллэрин, Арассыыйа саҥа эрэгийиэннэрин дэлэгээссийэлэрин, Саха сириттэн волонтердары уонна анал байыаннай дьайыы зонатыттан кэлбит байыастары кытыннаран ыытыллыахтара», — диэн Донбааска көмө уонна өйөбүл Хотугулуу-Илиҥҥи пуондатын уонна «Бииргэ Кыайыыга!» хамыыһыйа сүрүннүүр киинин салайааччыта Георгий Куркутов бэлиэтээтэ.
Пуорум иннинэ муниципалитеттарга нэһилиэнньэни кытта көрсүһүүлэр, оттон үөрэх тэрилтэлэригэр тиэмэлээх кылаас чаастара ыытылыннылар. Сэтинньи 2 күнүттэн «Патриот» ыччат киинигэр анал байыаннай дьайыыга анаммыт быыстапкалар арыллыахтара, патриотическай кэнсиэртэр уонна бэтэрээннэри кытта көрсүһүүлэр буолуохтара. Сэтинньи 3 күнүгэр Өрөспүүбүлүкэтээҕи медиа-кииҥҥэ байыаннай уокуруктар пресс-кэмпириэнсийэлэрэ, ону тэҥэ Арассыыйа Дьоруойдарын дьиэ кэргэттэрин кэмитиэтэ гражданнары кытта көрсүһүүтэ ыытыллыаҕа. Норуот сомоҕолоһуутун күнүгэр, сэтинньи 4 күнүгэр, киэҥ спортивнай уонна култуурунай бырагыраама былааннанар: национальнай спорт көрүҥнэригэр турнирдар, «Мин историям» музей комплексыгар быыстапкалар арыллыылара уонна патриотическай аахсыйалар.
IV «Норуот уонна аармыйа биирдэр» диэн өрөспүүбүлүкэтээҕи фашизмы утары пуорум сүрүн тэрээһининэн сэтинньи 5 күнэ буолуоҕа. Бу күн Норуоттар доҕордоһууларын дьиэтигэр пуорум пленарнай мунньаҕа уонна «Восток» байыаннай бөлөх командованиетын, оройуоннар баһылыктарын, өрөспүүбүлүкэ министиэристибэлэрин уонна биэдэмистибэлэрин бэрэстэбиитэллэрин кытыннаран төгүрүк остуол ыытыллыаҕа. Эдэр ыччакка уонна иитэр үлэ исписэлиистэригэр анал сэминээрдэр тэриллиэхтэрэ.
Сэтинньи 6 күнүгэр тэрээһиннэр Горнай улууһугар уонна Дьокуускайга салҕаныахтара, ол кэнниттэн пуорум түмүктэрэ оҥоһуллуохтара.
«Урукку сылларга пуорум кыттыылаахтара Нам уонна Хаҥалас улуустарыгар сылдьыбыттара. Горнай улууһугар муниципальнай тэриллиилэр салайааччылара уонна уопсастыба бэрэстэбиитэллэрэ кыттыылаах төгүрүк остуоллар былааннаналлар. Горнай улууһун үөрэх тэрилтэлэригэр анал байыаннай дьайыы кыттыылаахтарын дьиэ кэргэттэрин уонна ыччаты кытта көрсүһүүлэр тэриллиэхтэрэ», — диэн Георгий Куркутов эбэн эттэ.
Санатар буоллахха, «Норуот уонна аармыйа биирдэр» диэн өрөспүүбүлүкэтээҕи фашизмы утары пуорум Саха сиригэр төрдүс төгүлүн ыытыллар уонна 1942 сыллаахха Аҕа дойду Улуу сэриитин кэмигэр Дьокуускайга ыытыллыбыт фашизмы утары миитин дьыалатын уонна үгэстэрин салгыыр.
