«Роскачество» арыы эбиилээх скумбрияттан оҥоһуллубут кэнсиэрбэ 37 мааркатын чинчийбит. Бу туһунан РИА Новости иһитиннэрэр.
Эксперттэр бородууксуйаны доруобуйаҕа куттала суоҕуттан саҕалаан, маркировка дьиҥнээҕэр уонна көрүҥүн солбуйууга тиийэ үөрэппиттэр. Сүрүн түмүк: бары кэнсиэрбэ доруобуйаҕа куттала суох, ол эрээри 15 маарка булгуччулаах ирдэбиллэри кэспит.
Кэһиилэр маннык мааркалаах кэнсиэрбэлэргэ көстүбүттэр: «Вкусные консервы», «Каждый день», «Люди любят», «Мореcлав», «Морское содружество», «Морские традиции», «Морской котик», «Онежские деликатесы», «Посейдон», «Хозяин Балтики», «Фишмар», Aro, Globus, Gold Fish уонна ZR.
Балык бааҥкаҕа 50% итэҕэһэ суох буолуохтаах.
«Каждый день», «Посейдон», «Хозяин Балтики» уонна Aro кэнсиэрбэлэргэ бу көрдөрүү тутуһуллубатах. Түөрт мааркаҕа этикеткэҕэ суруллубут балык ыйааһына дьиҥнээҕэр сөп түбэспэтэх. «Морские традиции» уонна «Морское содружество» кэнсиэрбэлэргэ скумбрия көрүҥэ солбуллубута биллибит. «Онежские деликатестарга» балык зоологическай аата суох, оттон белок уонна сыа көрдөрүүлэрэ дьиҥнээххэ сөп түбэспэттэр.
Алта мааркаҕа туус нуорманы таһынан элбэх. «Беринг» кэнсиэрбэҕэ кытаанах балык уҥуохтара, «Знаток» — консистенцията кураанах, «5 Морей» — аһыы амтан кыратык биллэр.
37 чинчиллибит бааҥкаттан бииригэр да микробиологическай көрдөрүүлэргэ, дьааттаах эттиктэр уонна гистамин баар буолууларыгар кэһии көстүбэтэх.
Булгуччулаах уонна инники ирдэбиллэргэ 12 маарка кэнсиэрбэтэ эппиэттиир: «Азбука моря», «Барс», «Владкон», «Главпродукт», «Доброфлот», «Морепродукт», «Рыбное меню», «Совок», «Сохраним традиции», «Спецзаказ», «Ультрамарин» уонна Fish House. Бу бородууксуйа Арассыыйа Хаачыстыба бэлиэтигэр хандьыдааттыан сөп.
Кэһиилэр тустарынан «Роскачество» хонтуруоллуур-кэтээн көрөр уорганнарга, эргиэн ситимнэригэр уонна оҥорооччуларга иһитиннэрдэ.
