Саха сирин олохтоохторун бэнсиининэн уонна сэлээркэнэн хааччыйыы быһыыта-майгыта туруктаах, уматык тиэрдиллиитэ уонна тарҕаныыта былаан быһыытынан барар. Бу туһунан брифиҥҥэ өрөспүүбүлүкэ гражданскай оборона дьыалаларыгар уонна олох-дьаһах куттала суох буолуутун хааччыйыыга миниистирин солбуйааччы Никита Павлов иһитиннэрдэ.
Кини этэринэн, «Туймаада-Нефть» уонна «СибОйл» авто-сапараапка ыстаансыйаларыгар урут киллэриллибит уматыгы биэриигэ быстах хааччахтар, ол иһигэр анал иһиккэ кутууга, тохтотуллубуттар. Ол гынан баран «Саханефтегазсбыт» автосапараапкатын ыстаансыйаларыгар хааччахтар салҕаналлар — биир көлөҕө 20-тан 30 лиитэрэҕэ диэри лимииттэр олохтоноллор.
Уматыгынан туруктаах хааччыйыыны тутар туһугар өрөспүүбүлүкэҕэ тимир суолунан уматык эбии баартыйалара тиэрдиллэ тураллар. Кэлэр уматык ниэп базаларыгар салгыы туһанааччыларга тарҕатарга ыытыллар.
Павлов өрөспүүбүлүкэни уматыгынан хааччыйыы быһыыта-майгыта туруктааҕын, олохтоохтор бэнсиининэн уонна дизель уматыгынан былаан быһыытынан хааччыллалларын бэлиэтээтэ. Кини этэринэн, муус турдаҕына суол аһыллыар диэри уматыкка сезон ардынааҕы саппаас тэриллибит — бу саппаас толору хааччыллыбыт.
Саха сирин бары улуустарыгар наадалаах уматык кэмигэр кэлэрин туһугар анал тэрилтэлэр уматык биэрээччилэри кытта салгыы бииргэ үлэлэһэллэр.
