2026 сыл саҕаланыаҕыттан Саха сиригэр доруобуйа харыстабылын 10 эбийиэгэ үлэҕэ киирдэ. Бары дойду бэрэсидьиэнэ Владимир Путин көҕүлээбит «Уһун уонна көхтөөх олох» национальнай бырайыак чэрчитинэн тутулуннулар. Саҥа эбийиэктэр Саха сирин олохтоохторугар мэдиссиинэ көмөтүн оҥорорго уонна исписэлиистэр үлэлииллэригэр табыгастаах усулуобуйаны тэрийдилэр. Бу туһунан Саха сирин Доруобуйа харыстабылын министиэристибэтин пресс-сулууспата иһитиннэрэр.
«Арассыыйа Бэрэсидьиэнэ Владимир Путин быһаарыытынан олоххо киирэр национальнай бырайыактар өрөспүүбүлүкэ социальнай инфраструктуратын утумнаахтык саҥардарга кыаҕы биэрэллэр. Тутуу салаатын соруга — олохтоохторго наадалаах эбийиэктэри хаачыстыбалаахтык уонна кэмигэр тутуу», — диэн Саха сирин тутууга миниистирэ Виктор Романов бэлиэтээтэ.
Ол курдук, Нам улууһун Нам сэлиэнньэтигэр эмтиир куорпус, Амма улууһун II Чакыр, Уус Алдан улууһун Бэйдиҥэ, Сунтаар улууһун Тойбохой, Үөһээ Бүлүү улууһун Боотулуу, Ньурба улууһун Чаппанда, Нам улууһун Кириэс-Кытыл, Мэҥэ Хаҥалас улууһун Табаҕа, Таатта улууһун Томтор сэлиэнньэлэригэр уонна Дьокуускай куорат Марха микро-оройуонугар быраас амбулаториялара үлэҕэ киирдилэр.
«Саҥа амбулатория арыллан, үлэлииргэ уонна мэдиссиинэ көмөтүн оҥорорго быдан табыгастаах усулуобуйаланныбыт. Улахан дьону оҕолору кытары көрөбүт, күн аайы сэрэтэр көрүүлэри ыытабыт. Саҥа тэрил мэдиссиинискэй үлэһиттэр соруктарын ордук көдьүүстээхтик толороллоругар көмөлөһөр, оттон эмтэнээччилэргэ көмөнү ылыыны табыгастаах оҥорор. Хас биирдии олохтоох исписэлиискэ кэмигэр көрдөрүнэр уонна наадалаах көмөнү дьиэтин таһыгар ылар кыахтаах буолара биһиэхэ улахан суолталаах», — диэн Табаҕа быраас амбулаториятын учаастактааҕы терапевт-бырааһа Уруйдаана Сергучева бэлиэтээтэ.
«Национальнай бырайыактары олоххо киллэрии түмүгэр өрөспүүбүлүкэ мэдиссиинэтин инфраструктуратын улахан кээмэйинэн саҥардыы салҕанар. Урукку кэмҥэ суох элбэх балыыһа, ФАП, быраас амбулаторията үлэҕэ киирэн, эрэгийиэн олохтоохторо хаачыстыбалаах мэдиссиинэ көмөтүн бастыҥ усулуобуйаҕа ылаллар», — диэн Саха сирин доруобуйа харыстабылын миниистирэ Лена Афанасьева чопчулаата.
Санатан эттэххэ, 2018 сылтан Саха сиригэр 130-тан тахса доруобуйа харыстабылын эбийиэгэ үлэҕэ киирбитэ. Улахан кээмэйдээх модернизация бүтүн өрөспүүбүлүкэни хабар: онкологическай уонна кардиологическай кииннэр курдук улахан анал кииннэртэн саҕалаан, ыраах нэһилиэктэр быраас амбулаторияларыгар тиийэ араас эбийиэктэри таарыйар.
